Паказаны праект самага вялікага лайнера ў гісторыі ФОТЫ
Амерыканская круізная кампанія Royal Caribbean паказала праект круізнага лайнера «Ікона мораў» (Icon of the Seas), які павінен стаць найбуйнейшым у свеце. Гэты тытул ён адбярэ ў іншага судна кампаніі «Цуд мораў».
Як паведамляецца на сайце кампаніі, лайнер павінен адправіцца ў першае падарожжа ў студзені 2024 года і будзе прапаноўваць шырокі выбар паслуг і забаў — ад пляжнага адпачынку да аквапарку, як для сем'яў, так і для пар або кампаній. Браніраваць месцы ўжо можна цяпер.
На судне будзе сем басейнаў, дзевяць джакузі, шэсць водных горак, больш за сорак рэстаранаў, бараў і начных клубаў.
А ў цэлым тэрыторыя лайнера будзе падзелена на пяць «раёнаў»: Thrill Island з самым вялікім «аквапаркам у моры» для актыўнага адпачынку, Chill Island з басейнамі і барамі для расслабленага адпачынку, Surfside для сямейнага адпачынку, The Hideaway з імітацыяй пляжнага адпачынку і AquaDome для вячэрняга забаўляльнага адпачынку.
«Ікона мораў» будзе адпраўляцца з Маямі (ЗША) у тыднёвае падарожжа на ўсходнія і заходнія Карыбы, у тым ліку заязджаючы на Багамскія астравы, у Мексіку, Сен-Мартэн і Гандурас.
Тэхнічныя характарыстыкі новага судна:
Танаж: 250 800 тон;
Даўжыня: 365 метраў;
Колькасць кают: 2805;
Экіпаж: 2350 чалавек.
Колькасць пасажыраў: 5610.
Лайнер стане першым суднам кампаніі, якія выкарыстоўваюць у якасці паліва звадкаваны прыродны газ.
