За сардэчка, кулак і вікторыю актывісты атрымалі 3 і 1,5 года абмежавання волі
У судзе Партызанскага раёна г. Мінска 14 мая вынесены прысуд па крымінальнай справе па абвінавачванні 37-гадовага Дзмітрыя Таратуна і яго 23-гадовай знаёмай Дзіяны Казак па ч. 2 артыкула 339 (злоснае хуліганства), паведамляюць праваабаронцы.
Дзмітрый Таратун і Дзіяна Казак. Фотакалаж з сацыяльных сетак
Справу разглядала суддзя Наталля Дзядкова. Дзяржабвінаваўца — пракурор Вароніч
Згодна з матэрыяламі справы Таратун і Казак у пачатку лютага 2021 года, у начны час, нанеслі на фасад будынка трансфарматарнай падстанцыі на вул. Стаханаўскай, каля дома 36а, фарбай малюнак. Сума нанесенай шкоды — 32 рублі 90 капеек.
Пад час следства Таратун быў звольнены з месца працы, Казак была звольненая па пагадненні бакоў.
Сёння суддзя Наталля Дзядкова вынесла прысуд: Дзмітрыю Таратуну — тры гады абмежавання волі з накіраваннем ва ўстанову адкрытага тыпу, Дзіяне Казак — паўтары гады абмежавання волі без накіравання ва ўстанову адкрытага тыпу.