«Засталося як бы дзве карты». Сямашка кажа, што тэрмін падпісання ссунуўся на паўгода
Тэрмін падпісання «дарожных карт» па інтэграцыі Расіі і Беларусі можа ссунуцца на верасень-кастрычнік, паведаміў пасол Беларусі Уладзімір Сямашка журналістам у Екацярынбургу, піша Інтэрфакс.
Ён адзначыў, што «з 28 неабходных для падпісання карт 26 ужо запарафіраваны юрыстамі Расіі і Беларусі і гатовыя да падпісання».
«Засталося як бы дзве карты. Гэтая тэма будзе абмяркоўвацца на ўзроўні прэм'ер-міністраў, напрыклад. У канцы чэрвеня будзе форум рэгіёнаў Расіі і Беларусі. Потым будзе пасяджэнне ўрада Саюзнай дзяржавы, дзесьці ў ліпені-жніўні. Я раней думаў, што, можа быць, у красавіку-маі будуць падпісаныя астатнія дзве карты. Але цяпер бачу, што зрух можа адбыцца на верасень-кастрычнік», — сказаў Сямашка.
У прыватнасці, ён адзначыў, што патрабуе дадатковага ўзгаднення дарожная карта, якая датычыцца кааперацыі вытворчасці.
