Генпракурор прапанаваў жорстка караць за пашырэнне «экстрэмісцкіх поглядаў і сімволікі»
Генеральная пракуратура прапануе ўнесці шэраг змяненняў у Крымінальны кодэкс, якія робяць больш жорсткай адказнасць за экстрэмізм. Пра гэта ў эфіры тэлеканала СТБ заявіў кіраўнік ведамства Андрэй Швед.
Паводле яго слоў, некаторыя артыкулы кодэкса трэба дапоўніць нормамі аб тым, што «крымінальнай адказнасці будуць падлягаць не толькі арганізатары экстрэмісцкіх фарміраванняў і іх кіраўнікі, але і любыя ўдзельнікі». Пакаранне таксама павінна распаўсюджвацца на тых, хто фінансуе «экстрэмісцкія фармаванні» і спрыяе іх дзейнасці, мяркуе Швед.
Генпракурор заявіў, што пад садзейнічаннем ён мае на ўвазе навучанне людзей, распаўсюд сярод іх «экстрэмісцкіх поглядаў і сімволікі». Гаворка ідзе аб дзеяннях, скіраваных на «дэстабілізацыю грамадскай абстаноўкі, парушэнне грамадскага парадку і іншыя супрацьпраўныя і негатыўныя наступствы», дадаў ён.
Паводле слоў Шведа, папраўкі прапануецца ўнесці не толькі ў закон аб процідзеянні экстрэмізму, але і ў шэраг іншых актаў заканадаўства.
Нагадаем, па артыкуле КК аб стварэнні экстрэмісцкага фармавання заведзеная крымінальная справа супраць Каардынацыйнай Рады Святланы Ціханоўскай.