Міліцыя Дзяржынска шукае «інфармацыю кампраметуючага характару» праз электрасеткі
Цікавы дакумент у Рэдакцыю даслалі чытачы з Дзяржынска. У ім сказана, што міліцыя праводзіць праверку ўдзельнікаў несанкцыянаваных акцый і просіць перадаць у органы інфармацыю пра запазычанасць па аплаце за электраэнергію, парушэнні пажарнай бяспекі і іншыя кампраметуючыя факты.
У спіс трапілі тыя, хто прыцягваўся па артыкуле 23.34. Вядома, што па асобных адрасах сёння наведваліся з праверкай «па запыце міліцыі».
«Прыходзілі з Энергазбыту. Паглядзелі паперу на аплату, сказалі, што ўсё выдатна», — распавёў адзін з фігурантаў спісу.
«Наша Ніва» звярнулася да кіраўніка Дзяржынскага РАУС Яўгена Жылінскага, але ён адмовіўся ад каментараў.
Сітуацыю праяснілі ў прэс-службе УУС Мінаблвыканкама.
«Супрацоўнікі Дзяржынскага РАУС працуюць у межах прававога поля», — коратка паведамілі там.