У Магілёве начальніца пошты выкрадала грашовыя пераводы і атрымлівала грошы памерлай пенсіянеркі
Магілёўскі аддзел Следчага камітэта расследуе крымінальную справу ў дачыненні да 41-гадовай жыхаркі Магілёва, падазраванай у крадзяжы грошай шляхам злоўжывання службовымі паўнамоцтвамі, паведамляе sk.gov.by.
Паводле следства, падазраваная, працуючы начальніцай аднаго з паштовых аддзяленняў, не менш за тры гады выкрадала грашовыя пераводы. Ад дзеянняў жанчыны пацярпелі індывідуальныя прадпрымальнікі, якія рэалізоўвалі свой тавар праз інтэрнэт і дасылалі яго з накладзеным плацяжом пакупніку. Пры атрыманні пасылкі ў іншым паштовым аддзяленні адрасат аплачваў суму накладзенага плацяжу, якая затым пералічвалася на адрас адпраўніка грашовым пераводам. Прадпрымальнікі належным чынам не вялі ўлік атрыманай аплаты, чым і скарысталася падазраваная, прысвойваючы частку грашовых пераводаў.
Гэты спосаб быў не адзіным. Калі людзі выпісвалі газеты і часопісы на хатні адрас, падазраваная ўносіла лжывыя звесткі ў базу даных, паказваючы падпіску да запатрабавання, якая танней. Розніцу прысвойвала.
Таксама высветлена, што падазраваная, дакладна ведаючы аб смерці пенсіянеркі, прысвойвала грашовыя сродкі, якія прадпрыемства пералічвала ёй два разы на год у якасці ўзнагароджання як былому работніку.
Сёлета адзін з пацярпелых прадпрымальнікаў звярнуў увагу на недастатковую колькасць атрыманых пераводаў і звярнуўся ў міліцыю.
Папярэдне ўрон ад дзеянняў падазраванай складае больш за сем тысяч рублёў. Следства працягваецца.
