У жанчыны з Жыткавічаў не было каранавіруса, проста двухбаковая пнеўманія — дактары
Як паведаміў «Новаму Палессю» намеснік начальніка галоўнага ўпраўлення аховы здароўя Гомельскай вобласці Міхаіл Змушко, шэраг тэстаў не пацвердзіў наяўнасць COVID-19 у пацыенткі з Жыткавічаў.
Фота Надзеі Бужан.
Стан жанчыны стабільны, пасля заканчэння курса стацыянарнага лячэння яе выпішуць. На заўтра запланавана выпіска асоб кантакту 1 ўзроўню з устаноў аховы здароўя.
Гаворка ідзе пра 58-гадовую жыхарку Жыткавічаў, яна знаходзілася ў стабільна цяжкім стане ў гомельскай рэанімацыі. Дыягназ — двухбаковая пнеўманія.
Ні жанчына, ні яе акружэнне не выязджалі за мяжу.
У жанчыны паднялася тэмпература, пачаўся сухі кашаль. У раённай паліклініцы ёй паставілі дыягназ «вострая рэспіраторная вірусная інфекцыя» і выпісалі антыбіётыкі. Вынікаў гэта не давала, і ў суботу жанчына пайшла ў Жыткавіцкую паліклініку да тэрапеўта. Пасля кансультацыі выйшла з кабінета і страціла прытомнасць. Толькі тады ў яе дыягнаставалі двухбаковую пнеўманію. Тады ж зрабілі першы тэст на каранавірус — і атрымалі станоўчы вынік.
