Новы агмень. У Іспаніі за дзень ад каранавіруса памерла 182 чалавекі
Па ўсёй Іспаніі закрыты не толькі школы, але таксама бары і кавярні. Фота elperiodico.com
У Іспаніі за дзень ад каранавіруса памерла 182 чалавекі. Пра гэта паведамілі санітарныя службы краіны.
Іспанія ператварылася ў другі пасля Італіі агмень эпідэміі ў Еўропе.
Ад панядзелка ўлады краіны ўвялі строгія абмежаванні на актыўнасць і перасоўванні людзей. Закрытыя школы, універсітэты, культурныя і спартовыя ўстановы, а таксама бары і рэстараны. Да патрулявання вуліц краіны далучыліся Узброеныя сілы каралеўства.
Агульная колькасць выяўленых носьбітаў віруса ў Іспаніі перавысіла 11 тысяч. Варта адзначыць, што гэтая лічба няпоўная, бо ў Мадрыдзе, на які прыпадае палова заражэнняў, людзей з лёгкімі сімптомамі перасталі тэсціраваць праз перагрузку лабараторных магутнасцей.
Беларусь па стане на 16 сакавіка заставалася на перыферыі пандэміі каранавіруса. У краіне зафіксавана 36 выпадкаў заражэння, 35 з іх лёгкія.
Тым не менш, у адпаведнасці з рэкамендацыямі Міністэрства аховы здароўя ўніверсітэты Беларусі перайшлі на безлекцыйнае навучанне.
Заняткі працягваюцца, але перавага аддаецца дыстанцыйным метадам, а таксама лабараторным і семінарным заняткам, каб навучэнцы не збіраліся вялікімі групамі.
Акрамя таго, некаторыя факультэты змянілі расклад так, каб студэнты не мянялі аўдыторый, а заставаліся ў той самай аўдыторыі.
На каранцін адпраўляюць тыя групы студэнтаў, у якіх ёсць інфікаваны. Такое адбылося, напрыклад, у Беларускім дзяржаўным універсітэце. Нітачкі заражэння ў Беларусь ідуць з Ірана, Італіі, Нямеччыны і Расіі.
Вірус у Беларусі пакуль амаль не зачапіў людзей старэйшага ўзросту, для якіх ён уяўляе найбольшую небяспеку.
Па стане на вечар 15 сакавіка колькасць выяўленых ахвяр каранавіруса ў свеце перавысіла 7100. Усяго ў свеце выяўлена больш за 183 тысячы заражэнняў. Асабліва трывожная сітуацыя складаецца ў Італіі, Іране, Іспаніі.
Высокая колькасць смяротных выпадкаў прапарцыйна да колькасці выяўленых носьбітаў фіксуецца ў Інданэзіі, Францыі, ЗША, Нідэрландах і на Філіпінах. Гэта можа азначаць, што ў дадзеных краінах выяўленая толькі малая доля носьбітаў інфекцыі. Аналагічнае адносіцца да Іспаніі і Італіі.
Па колькасці выяўленых заражэнняў на душу насельніцтва ў чырвонай зоне таксама Швейцарыя, Нарвегія, Данія, Эстонія, Славенія, Швецыя, Аўстрыя.
Можна чакаць, што сітуацыя ў найбліжэйшыя дні будзе абвастрацца. Пакуль свайго піку ў Еўропе і ЗША эпідэмія не дасягнула.
Большасць еўрапейскіх краін увялі строгія каранцінныя меры, спынілі заняткі ў школах і ўніверсітэтах і рыхтуюць праграмы дапамогі кампаніям, якія пацерпяць ад эканамічнага спаду ў выніку пандэміі.
