Кітай паказаў найгоршыя эканамічныя паказчыкі за 30 гадоў
Падзенне прамысловай вытворчасці ў Кітаі ў першыя два месяцы гэтага года стала самым сур'ёзным за апошнія 30 гадоў, паведамляе агенцтва Reuters зыходзячы з статыстычных звестак, апублікаваных ўладамі КНР.
У студзені-лютым прамвытворчасць ўпала на 13,5% у параўнанні з аналагічным перыядам мінулага года. У снежні 2019 года, калі ў краіне яшчэ не было выяўлена вялікай колькасці хворых на каранавірус, гэты паказчык рос на 6,9%.
Зніжэнне статыстычных паказчыкаў аказалася большым за чаканае. Найбольшыя праблемы былі выяўленыя ў прыватнасці ў сферы гандлю (падзенне на 20,5%), інвестыцый у асноўны капітал (-24,5%).
Экспарт з КНР знізіўся ў студзені-лютым на 17,2%.
Нягледзячы на заявы кітайскіх уладаў аб пераадоленні ў краіне піка каранавіруса аналітыкі паказваюць, што для вяртання да нармальнай сітуацыі эканоміцы КНР спатрэбіцца яшчэ некалькі месяцаў. Тым больш, што распаўсюд інфекцыі па свеце можа прывесці да глабальнай рэцэсіі, што негатыўна адаб'ецца на попыце на кітайскія тавары.