Вільня на пяць тыдняў закрывае дзіцячыя сады і школы
Віленскае гарадское самакіраванне закрывае на пяць тыдняў усе адукацыйныя ўстановы і публічныя месцы, піша Delfi.lt.
Мэрыя паведаміла, што, па ўказанні дырэктара адміністрацыі Повіласа Падзярскіса, сёння было вырашана спыніць усе мерапрыемствы ў закрытых памяшканнях, у якіх удзельнічае больш за 100 чалавек.
Таксама з пятніцы будзе спыненая праца сталічных музеяў, кінатэатраў, спартклубаў і іншых месцаў забаў. З заўтрашняга дня да канца велікодных канікул усе агульнаадукацыйныя ўстановы ў сталіцы будуць закрытыя — дзіцячыя садкі, школы, універсітэты, адмяняюцца ўсе мерапрыемствы. Аднак мэрыя рэкамендуе жыхарам не зачыняцца ў чатырох сценах — рэкамендуе гуляць на вуліцы, займацца спортам на вуліцы, ездзіць на прыроду.
«Мы бачым прыклады замежных краін, бачым як хутка распаўсюджваецца вірус. Нягледзячы на тое, што ў Вільні яшчэ няма пацверджаных выпадкаў, мы разумеем, што калі сітуацыя зменіцца — гэта толькі пытанне часу, таму мы не можам марудзіць, мы павінны рэагаваць, каб абараніць віленчукоў, асабліва самыя ўразлівыя групы. Гэта складаныя рашэнні, мы усе сутыкнёмся з нязручнасцямі і стратамі, але без гэтага наступствы будуць больш сур'ёзныя. У гэты перыяд заклікаю шанаваць працу лекараў і берагчы іх — толькі ад іх цярпення і здароўя залежыць, як нас закране гэты вірус», — сказаў мэр горада Рэмігіюс Шымашус.
