Першае футбольнае «класіка» — ужо сёння. Што нас чакае ў чвэрцьфіналах Кубка Беларусі?
Футбольны сезон у Беларусі стартаваў матчам за Суперкубак, які ўпершыню прайшоў без удзелу барысаўскага БАТЭ. На чарзе — кубкавыя чвэрцьфіналы, у якіх мусіць быць не менш спякотна. Разам з Букмекерскай канторай Марафон мы зноў будзем назіраць за айчынным футболам.
Брэсцкае «Дынама» выйграла трэці Суперкубак запар. Фота: «Дынама-Брэст»
Больш падрабязна пра міжсезонныя змены ў клубах мы раскажам у анонсе першага тура чэмпіянату. Пакуль жа звернем увагу на расклады першых чвэрцьфінальных матчаў, якія адбудуцца ў панядзелак і аўторак.
«Тарпеда-БелАЗ» — «Шахцёр»
- 09.03, 18:00. Жодзіна, стадыён «Тарпеда».
- Каэфіцыенты: «Тарпеда» (перамога) — 4.333; нічыя — 3.54; «Шахцёр» (перамога) — 1.76.
Юрый Пунтус не надта паспяхова пачаў свой шлях у якасці трэнера жодзінскай «Тарпеды», да таго ж не змог выклікаць прыхільнасць да сябе з боку фанатаў.
У міжсезонцы трэнер распачаў маштабную перабудову каманды. На месца леташніх лідараў кшталту Багдана Мышэнкі і Уладзіслава Клімовіча прыйшлі гульцы куды ніжэйшага класу. А мэты пастаўлены высокія — першая тройка. Дасягнуць яе будзе неймаверна складана, калі не сказаць, што немагчыма.
У Салігорску таксама змены. Юрый Вернідуб мяняе гульнявы почырк каманды, што можна было назіраць падчас Суперкубка. Пладоў гэта пакуль што не дало, але «Шахцёр» слабейшым відавочна не стаў.
Прагноз «НН»: перамога «Шахцёра».
«Дынама-Мінск» — БАТЭ
- 09.03, 20:00. Мінск, стадыён «Дынама».
- Каэфіцыенты: «Дынама» (перамога) — 4.65; нічыя — 3.60; БАТЭ (перамога) — 1.70.
Першае за доўгі час міжсезонне без чэмпіёнства прайшло для БАТЭ даволі спакойна. Удалося пазбегнуць сур'ёзных кадравых страт (хіба што Аляксей Рыяс перайшоў у мінскае «Дынама»), а сярод навічкоў аказаліся даўнія знаёмыя: Павел Няхайчык і Аляксандр Валадзько.
У мінскага «Дынама» зноў кадравы карагод. Але склад у «бела-блакітных» падабраўся даволі баявіты. Будзе цікава паназіраць, як сябе праявяць у новым клубе Іван Бахар, Яўген Шыкаўка і ўжо згаданыя Клімовіч з Рыясам.
Сярод навічкоў «Дынама» ёсць нават першы ў нашым футболе карэец Кім. Фота: «Дынама-Мінск»
Вядома, што на стварэнне гульнявой «хіміі» патрэбны час, і кубкавы іспыт супраць БАТЭ можа аказацца вельмі сур'ёзным. Але здаецца, што чакаць яскравага матча не варта.
Прагноз «НН»: тотал меншы за 2.5.
У сувязі са знікненнем магілёўскага «Дняпро» ў паўфінал аўтаматычна трапляе мазырская «Славія».
Дзяліцеся прагнозамі ў каментарах. Калі лічыце сябе экспертам у беларускім футболе, зрабіце стаўку ў Букмекерскай канторы Марафон!
