На Канарах сотням турыстаў забаранілі пакідаць гатэль: у аднаго з пастаяльцаў каранавірус
На востраве Тэнерыфе ў архіпелагу Канарскіх выспаў сотням турыстаў забаранілі пакідаць гатэль H10 Costa Adeje Palace. У італьянскага доктара, які пражываў у ім, выявілі каранавірус, піша bbc.com.
Сам доктар родам з рэгіёну Ламбардыя, дзе італьянская ўлада змагаецца з каранавірусам, паставіўшы на каранцін некалькі маленькіх гарадкоў.
Сотням гасцей гатэля сказалі заставацца ў сваіх пакоях на час правядзення аналізаў, паведамляюць іспанскія СМІ.
Гаворка ідзе пакуль пра маніторынг стану гасцей гатэля, а не каранцін.
Адзін з гасцей гатэля ў Facebook апублікаваў выяву цыдулкі, пакінутай пад дзвярыма яго пакоя ў аўторак.
У ёй напісана: «З сумам паведамляем вам, што па прычынах, звязаных з аховай здароўя, гатэль зачынілі. Пакуль санітарныя органы не паведамяць, вы маеце заставацца ў сваіх пакоях».
Паліцыянты не даюць людзям выходзіць з гатэля, паведамляюць іспанскія СМІ.
Адзін госць пазней сказаў Бі-бі-сі, што людзям цяпер дазваляюць перасоўвацца па гатэлі.