Папяровыя пратаколы ў судах заменяць на аўдыё- і відэазапіс
Дэпутаты ў першым чытанні прынялі змены ў закон, па якім пратаколы судовых пасяджэнняў будуць замененыя на аўдыё- і відэазапіс, піша Tut.by.
— Асноўнай крыніцай інфармацыі аб ходзе судовага разбору павінен стаць аўдыё- і відэазапіс, — растлумачыў сутнасць змяненняў у закон намеснік старшыні Вярхоўнага суда Валерый Калінковіч.
На паперы падчас пасяджэння будзе складацца толькі кароткі пратакол.
Магчымасць вядзення тэкставага пратакола будзе захавана толькі пры немагчымасці весці аўдыё- і відэазапіс, напрыклад, у тым выпадку, калі абсталяванне ў зале суда выйшла з ладу.
Дэпутат Андрэй Юніцын пацікавіўся, ці змогуць суды забяспечыць тэхнічную магчымасць вядзення аўдыё- і відэазапісу да моманту ўступлення закона ў сілу.
- Ва ўсіх судах ужо ёсць тэхнічная магчымасць хаця б аўдыёфіксацыі, — запэўніў Валерый Калінковіч.
Акрамя таго, залы судоў будуць абсталёўвацца апаратурай на працягу 2020 года.
— Да моманту ўступлення закона ў дзеянне ўся сістэма судоў агульнай юрысдыкцыі будзе да гэтага гатова, — сказаў намеснік старшыні Вярхоўнага суда.
Калінковіч распавёў, што сам на працягу сямі гадоў складаў папяровыя пратаколы судовых пасяджэнняў.
— Я ведаю, што гэта такое ў рэальным жыцці. Мы чакаем новага падыходу.