Адзінае меню ў школах Мінска з'явіцца на наступным тыдні
На наступным тыдні ў школьных сталовых Мінска новаўвядзенне — адзінае меню з двума комплексамі на выбар, пра гэта паведамілі БелТА ў Мінгарвыканкаме.
фота «Мінск-Навіны»
У ведамстве адзначылі, што ўжо ўрэгулявана пытанне адзінага харчавання ў школах Мінска. У меню будуць уключаны два комплексы на выбар. Зараз вядуцца абмеркаванні, хто будзе прапаноўваць і выбіраць меню. Улічвацца будуць альбо думкі бацькоў, альбо думкі дзяцей, якія змогуць збіраць настаўнікі.
Вучні 5-11 класаў атрымаюць права выбіраць паміж комплексам з супам і без яго. Колькасць пазіцый у меню застанецца нязменнай. Порцыі таксама пакуль што не плануюць памяншаць або павялічваць.
Абодва комплексы будуць аднолькавыя для ўсіх катэгорый дзяцей. Пры гэтым будуць улічвацца меркаванні школьнікаў, якія харчуюцца і платна, і за кошт бюджэту.
Забяспечыць аднолькавае харчаванне для ўсіх дзяцей у школах запатрабаваў Аляксандр Лукашэнка падчас наведвання 2 верасня школы-новабудоўлі ў Мінску.
