Туск: Развал СССР быў не катастрофай, а вялікім шчасцем — у тым ліку і для расіян
Старшыня Еўрапейскай рады Дональд Туск назваў развал Савецкага Саюза «вялікім шчасцем» для народаў былога СССР і ўсёй Еўропы. Такое меркаванне ён выказаў у сваёй прамове на Міжнароднай канферэнцыі з нагоды 10-годдзя ініцыятывы «Усходняе партнёрства» ў грузінскім Батумі, піша «Радыё Свабода».
Кажучы пра гэтую дату, Туск згадаў таксама, што ў 2019 годзе спаўняецца 30 гадоў з моманту вызваленьня Цэнтральнай і Усходняй Еўропы з-пад савецкага дамінавання ў 1989 годзе.
«Вось што прыйшло мне ў галаву. Вы памятаеце, як прэзідэнт Расіі сказаў у 2005 годзе: «Мы павінны прызнаць, што развал Савецкага Саюза быў самай вялікай геапалітычнай катастрофай стагоддзя». Сёння ў Грузіі я хачу сказаць гучна і выразна: развал Савецкага Саюза быў вялікім шчасцем для грузінаў, палякаў, украінцаў, гэтак сама як і для ўсёй Цэнтральнай і Усходняй Еўропы. І я перакананы, што і для расейцаў таксама», — сказаў Туск.
The collapse of the Soviet Union was NOT the greatest geopolitical catastrophe of the century. Today in Georgia I want to say loud and clear: the USSR collapse was a blessing to Georgians, Poles, Ukrainians and the whole of Central and Eastern Europe. And also to Russians.
Ён таксама назваў гэтую гадавіну «вельмі сімвалічным момантам» для абмеркавання дасягненняў «Усходняга партнёрства». Гэтае аб’яднанне, на думку Туска, дапамагло ўмацаваць і паглыбіць адносіны паміж усходнімі суседзямі Еўрасаюза.
У 2005 годзе Уладзімір Пуцін у сваім звароце да Федэральнага сходу назваў развал СССР, які адбыўся ў 1991 годзе, «найбольшай геапалітычнай катастрофай стагоддзя».
Ініцыятыва стварэння праграмы «Усходняе партнёрства» належыць Польшчы. Гэты фармат прадугледжвае ўдзел шасці краін Усходняй Еўропы: Украіны, Грузіі, Малдовы, Азербайджана, Арменіі і Беларусі. Першая сустрэча міністраў замежных справаў у рамках Усходняга партнёрства адбылася ў снежні 2009 году.
