Украіна забараніла заяўляцца ў адбор на «Еўрабачанне» дзецям, што выступалі ў Расіі
Нацыянальная грамадская тэлерадыёкампанія Украіны змяніла правілы адборачнага тура вакалістаў на дзіцячае «Еўрабачанне». Адпаведны дакумент апублікаваны на сайце конкурсу.
Цяпер дзецям, якія выступалі ў Расіі з 1 студзеня 2014 года, катэгарычна забаронена прадстаўляць Украіну на музычным конкурсе. Гаворка ідзе таксама пра вакалістаў, якія ў цяперашні час выступаюць на «тэрыторыі краіны-агрэсара» і ўдзельнічаюць у мерапрыемствах, арганізаваных расійскімі дзяржорганамі.
Удакладняецца, што, калі ўдзельнік адборачнага этапу схаваў факт канцэртнай дзейнасці ў Расіі, аргкамітэт можа зняць яго на любым этапе.
Тэлеканал NewsOne са спасылкай на прэс-службу НАТУ ўдакладняе, што рашэнне аб змене рэгламенту адбору прынята пасля сітуацыі з спявачкай Ганнай Корсун (Maruv), якая выступала ў Расіі. У лютым яна адклікала сваю кандыдатуру ад удзелу ў «Еўрабачанні-2019» ад Украіны, хоць перамагла ў нацыянальным адборы. Па словах спявачкі, яна не хацела «выступаць з лозунгамі, ператвараючы конкурс у промаакцыі палітыкаў».