Жыхар Жодзіна «хацеў дапамагчы» сябру, ударыў інспектара ДАІ — і атрымаў год з адтэрміноўкай
Ілюстрацыйнае фота Віктара Гіліцкага, kp.by
Выпадак адбыўся ў Жодзіна, піша EX-PRESS.BY.
П'янага 33-гадовага мінчука затрымалі за рулём аўтамабіля. А яго сябар, 37-гадовы жыхар Жодзіна, спрабаваў яму «дапамагчы»: спачатку ён пагражаў інспектару ДАІ, а потым некалькі разоў штурхнуў яго ў грудзі.
Судом горада Жодзіна падсуднаму было прызначана пакаранне: адзін год пазбаўлення волі з адтэрміноўкай выканання прысуду тэрмінам на адзін год. Цяпер у вольны ад працы час ён павінен будзе выканаць 120 гадзін грамадска-карысных работ.
«Фактычна сваімі дзеяннямі грамадзянін здзейсніў два злачынствы, — пракаментаваў прысуд пракурор горада Жодзіна. — Адно з іх абразу, іншае — прымяненне гвалту, якое адносіцца да катэгорыі «менш цяжкіх», па якіх прадугледжваюцца толькі пакаранні, звязаныя з ізаляцыяй: ад арышту да 6 гадоў пазбаўлення волі.
Судом горада Жодзіна былі ўлічаны такія абставіны, як стаўленне падсуднага да зробленага: абвінавачваны віну прызнаў у поўным аб'ёме і раскаяўся. Судом было ўстаноўлена, што ў мужчыны на ўтрыманні чацвёра малалетніх дзяцей. Суд улічыў і ўчыненне злачынства ў стане алкагольнага ап'янення».
Праз год адбудзецца яшчэ адно судовае паседжанне, на якім будзе вырашана пытанне аб прывядзенні пакарання ў выкананне альбо вызваленні ад яго, калі асуджаны будзе паводзіць сябе законапаслухмяна.
