У Мінску пройдзе Дзень Расіі, прыедуць «Начныя ваўкі» і Ларыса Доліна
Ужо не першы год у Верхнім горадзе ў Мінску ў летнія выходныя праходзяць дні культур самых розных краінаў і народаў. У мінулую суботу ў сталіцы Беларусі прайшоў дзень Швецыі, які скончыўся выступам пераможцы Еўрабачання Ларын, а ў гэтую суботу, 8 чэрвеня, пройдзе Дзень шматнацыянальнай Расіі.
Фота Сяргея Гудзіліна.
Святкаванне будзе адбывацца ад 12 да 22 гадзіны. У якасці гасцей фестываля з Расіі прыедуць «Хор Турэцкага», аркестр Ігара Бутмана, а таксама спявачка Ларыса Доліна (тая самая, якая спявала пра «пагоду дома»). Таксама можна будзе падзівіцца на дагестанскія і башкірскія танцы.
Да 16 гадзіны па Верхнім горадзе будуць працаваць інтэрактыўныя зоны: «Русь казачная», «Горад майстроў», «Палявая кухня», «Выстава расійскага аўтапраму», «Культура Расіі», «Расія турыстычная», «Краса Расіі»
Пройдзе конкурс на найлепшы касцюм у колерах сцягу Расіі.
Будуць працаваць «Рускі», «Паволжскі», і «Паўночна-Каўказскі» дворыкі. Пройдуць майстар-класы па ганчарстве, вязанню, кавальству, пляценню з лазы. У палатцы «Рады вітаць» пачастуюць квасам і пернікамі.
А на вуліцы Зыбіцкай дзяцей плануюць катаць на поні, а дарослых на матацыклах «Начных ваўкоў». А яшчэ ў дворыку гатэля «Манастырскі» плануюць паказаць расійскі фільм. Праўда, не кажуць, які ж менавіта.
