Лукашэнка распавёў, як трэба працаваць у гады выбараў
president.gov.by
Аляксандр Лукашэнка арыентуе вертыкаль улады на эфектыўную працу ў перадвыбарчыя гады. Пра гэта ён заявіў сёння на сустрэчы з актывам горада Баранавічы і Баранавіцкага раёна, піша БелТА.
«Трэба старацца заваёўваць давер людзей. Тым больш у гэтыя два гады, калі мы будзем здаваць іспыт. Людзей крыўдзіць ні ў якім разе нельга, але і хлусіць таксама ім нельга. Трэба зрабіць тое, што застанецца назаўсёды», - падкрэсліў беларускі кіраўнік.
Ніхто не хавае таго факту, што ў найбліжэйшыя два гады - напярэдадні прэзідэнцкіх і парламенцкіх выбараў — будзе весціся напружаная праца, дадаў Аляксандр Лукашэнка. «Але будзем працаваць так, каб гэта засталося і пасля перадвыбарнай кампаніі, каб нас людзі не папракнулі ў тым, што мы напярэдадні нейкіх палітычных падзеяў, перш за ўсё выбараў, нешта такое зрабілі, каб падсаладзіць людзям жыццё, а потым пра іх забудзем. Гэтага ніколі не было і не будзе! У нас іншая палітыка», - заявіў кіраўнік дзяржавы.
Ён дадаў, што падобныя сустрэчы з актывамі рэгіёнаў надалей будуць традыцыйнымі.
