На БТ запускаюць шоу «Муж напракат»
Новае рэаліці-шоу прапануе сваім гледачам «Беларусь 2» акурат напярэдадні Дня закаханых, 13 лютага, паведамляе «Звязда».
Называецца гэты тэлепраект, зняты і «абкатаны» расійскімі тэлевізійнікамі ўжо летась, «Муж напракат».
Сямейныя пары, у якіх незадаволенасць сужэнцаў адно адным дасягнула крытычнага перадразводнага градуса, спрабуюць усё ж пераадолець крызіс стасункаў з дапамогай псіхолага, дзеля чаго кожны на працягу некалькіх дзён жыве з новым чалавекам, які ўвасабляе для іх бездакорнасць і ідэал: напрыклад, жанчыны «бяруць напракат» узорнага сем'яніна, афіцэра ці вядомага мастака, мужчыны ж правяраюць, што такое жыць побач з перакананай чайлд-фры альбо самадастатковай і ўпэўненай у сабе бізнэсвумен.
Псіхолаг і вядучая праекта Іна Чудзінава на ўсіх этапах знаходзіцца побач з героямі і цікавіцца, што іх задавальняе ў пераменах, а што не спраўджвае чаканні. Аказваецца, часта стомленым ад уласнага сямейнага ладу людзям дастаткова, каб іх проста выслухалі, не перабіваючы… У фінале ж кожнаму ўдзельніку трэба шчыра адказаць самому сабе, ці насамрэч усё так дрэнна ў іхняй сям'і і ці такія ўжо ідэальныя новыя партнёры, — а гледачы ўбачаць, якія разбітыя кубкі яшчэ можна склеіць, і, мабыць, зробяць пэўныя высновы для сябе.
