Са сцен на станцыях мінскага метро прыбіраюць рэкламу
Сцены на станцыях мінскага метро ачышчаюць ад рэкламы, інфармацыя будзе размяшчацца на лайтбоксах, плазменных экранах і ВК-маніторах, паведамілі карэспандэнту БелТА ў рэкламна-інфармацыйным аддзеле сталічнай падземкі.
Работа праводзіцца паэтапна ў адпаведнасці з дызайн-праектамі, якія ўзгоднены камітэтам архітэктуры і горадабудаўніцтва Мінгарвыканкама. Змены ўжо адбыліся на станцыях «Маскоўская», «Плошча Якуба Коласа», «Акадэмія навук», часткова ад рэкламы ачысцілі і іншыя станцыі падземкі.
«Рэкламныя плакаты прыбіраем пасля заканчэння дзеяння дамоваў з рэкламадаўцамі. Да гэтай працы прыступілі з пачатку студзеня», — распавялі спецыялісты.
Як паведамлялася раней, камітэт архітэктуры і горадабудаўніцтва Мінгарвыканкама прыняў рашэнне ўпарадкаваць размяшчэнне сродкаў вонкавай рэкламы ў горадзе.
