Беларускамоўная студэнтка ГрДУ не рашылася задаць Лукашэнку пытанне па-беларуску
Аляксандр Лукашэнка наведаў Гродна 19 кастрычніка.
Апроч іншага, у праграме кіраўніка краіны была сустрэча са студэнтамі Гродзенскага дзяржаўнага ўніверсітэта, у час якой ён панаракаў на ад'езд моладзі на вучобу за мяжу, а таксама прапанаваў забіраць студэнтаў у войска ў час канікул.
Адметна, што на сустрэчы з Лукашэнкам прысутнічала беларускамоўная студэнтка Аляксандра Радковіч, яна вучыцца на трэцім курсе на філолага, летась Аляксандра стала «Студэнтам года» паводле версіі БРСМ.
Чытайце: Пераможца конкурсу «Студэнт года»: Адукацыя мае быць беларускамоўнай
Праўда, пытанне кіраўніку краіны яна задала па-руску. Гэтак жа дала і інтэрв'ю дзяржаўнаму тэлебачанню.
Лукашэнка падарыў ёй ручку.
Чаму яна не гаварыла з ім па-беларуску?
«Пыталася я сапраўды па-руску, а падарунак [ад універсітэта] прэзентавала па-беларуску», — адказала яна «Нашай Ніве».
