Трое катоў правялі 22 дні ў смяротнай пастцы і выжылі
У канадскім Эдмантане зоаабаронцы выпадкова пакінулі трох катоў у машыне і спахапіліся праз 22 дні. Як паведамляе партал навінаў CBC, жывёлам удалося выжыць.
Арганізацыя Edmonton Humane Society 5 чэрвеня апублікавала на сваёй старонцы ў Facebook прабачэнні за інцыдэнт.
Катоў даставілі ў прытулак у Эдмантане 27 сакавіка, аднак падчас разгрузкі машыны актывісты не заўважылі тры пераноскі з жывёламі. Іх выявілі толькі 18 красавіка, калі персанал пагрузіўся ў аўтамабіль, каб даставіць новую партыю бяздомных жывёл. Зоаабаронцы адзначылі, што ўвесь гэты час каты пакутавалі ад голаду і абязводжвання, таксама на іх лапках выявілі апёкі ад мачы. «Але, на шчасце, яны не захварэлі чымсьці сур'ёзным і не параніліся», — падсумавалі яны.
За гэты час, па словах абаронцаў жывёл, каты цалкам аднавіліся і ўжо знайшлі сабе новых гаспадароў.