Пашынян заклікаў да татальных акцый грамадзянскага непадпарадкавання
Пасля таго, як рэспубліканская большасць у парламенце прагаласавала супраць абрання Нікола Пашыняна на пасаду прэм'ер-міністра Арменіі, лідар пратэстнага руху ўвечары на шматлюдным мітынгу на плошчы Рэспублікі ў Ерэване заклікаў сваіх прыхільнікаў з серады аднавіць татальныя акцыі грамадзянскага непадпарадкавання.
«З 8:15 раніцы павінны пачацца татальная забастоўка, перакрыццё вуліц, метро, аэрапорта, міждзяржаўных і міжабласных трас і наогул усяго, што можна перакрыць», — заявіў Нікол Пашынян.
Па словах Пашыняна, у адрозненне ад папярэдніх дзён, актывістам руху ўжо не трэба будзе выбачацца перад грамадзянамі за прычыненыя ім нязручнасці. «Бо незадаволеных дзеяннямі актывістаў грамадзян можна будзе палічыць на пальцах: Армен Ашацян, Ара Баблаян, Ваграм Багдасаран і гэтак далей», — заявіў ён.
Пашынян заклікаў паліцыю адкласці дубінкі і шчыты і далучыцца да народа.
Ён таксама запрасіў усіх сваіх прыхільнікаў вечарам у 19:00 зноў сабрацца на мітынг на плошчы Рэспублікі.
