У Беларусі заўважаны расійскі бамбардзіроўшчык-ракетаносец
На беларускім авіярамонтным заводзе № 407 заўважаны рэдкі расійскі самалёт, навучальны бамбардзіроўшчык-ракетаносец Ту-134УБЛ. Мяркуючы па апублікаваных Defence Blog фота, самалёт прайшоў у Мінску рамонт з афарбоўкай. Самалёт афарбаваны ў шэры колер, на ім ёсць надпіс «Ваенна-марскі флот», расійскі трыкалор і сцяг ВМФ Расіі з эмблемай.
Дадзеная мадэль Ту-134 прызначана для навучання і трэніровак экіпажаў далёкіх і стратэгічных бамбардзіроўшчыкаў Ту-22М3 і Ту-160. У салоне ўстаноўлены крэслы для 12 курсантаў — у палёце яны па чарзе праходзілі практыку на месцы другога пілота.
Паколькі адной з галоўных задач Ту-22М3 з'яўляецца паляванне за авіяносцамі, частка самалётаў служыць у Марской авіяцыі ВМФ Расіі. Падобных самалётаў у Расіі адзінкі, два экзэмпляры замацаваныя за Цэнтрам баявога ўжывання і перавучвання асабовага складу авіяцыі ВМФ Расіі ў Ейску.
