Ад заўтра на цыгарэтах абавязкова будуць змяшчаць страшныя карцінкі пра шкоду курэння
Імпатэнцыя, гангрэна, пакутлівая смерць — гэтыя і яшчэ дзевяць страшных карцінак з 15 лістапада будуць друкавацца на пачаках цыгарэт у абавязковым парадку.
Першыя такія ўпакоўкі з’явіліся на беларускім рынку яшчэ ў верасні 2016 года. Але новымі правіламі кіраваліся не ўсе вытворцы Еўразійскага эканамічнага саюза, цяпер да гэтага прыйдуць усе без выключэнняў.
Старыя партыі цыгарэт могуць знаходзіцца ў продажы да іх поўнай рэалізацыі.
«Згодна з тэхнічным рэгламентам на тытунёвую прадукцыю, карцінкі з папярэджаннем павінны займаць 50% верхняй часткі пачкі на адным баку і 50% ніжняй часткі на адваротным, — патлумачылі «НН» у прадстаўніцтве «Брытыш Амерыкан Табака» у Беларусi. — Усяго ў Еўразійскім эканамічным саюзе зацверджаныя 12 розных малюнкаў з выявай наступстваў шкоднай звычкі. Таксама па новых правілах на баку пачкі павінны знаходзіцца наступны надпіс: «Змяшчае сістэмныя яды, канцэрагенныя і мутагенныя рэчывы».
Прыклад упакоўкі, зробленай па новых правілах.
Інфармацыю аб колькасці ўтрымання смалы і нікаціну ў тытунёвых вырабах на ўпакоўцы ўказваць забаронена.
