Беларусь могуць адхіліць ад ЧС па цяжкай атлетыцы
Беларусь і яшчэ восем краін могуць прапусціць чэмпіянат свету па цяжкай атлетыцы, паведамляе Inside The Games.
У гэтыя выходныя камісія Міжнароднай федэрацыі цяжкай атлетыкі (IWF) разгледзіць пытанне ўдзелу краін з шматлікімі допінгавымі парушэннямі ў чэмпіянаце свету 2017 года. Даклад камісіі будзе прадстаўлены выканаўчай радзе IWF ў канцы верасня.
Краіны, якія мелі тры i больш выпадкаў выкарыстання забароненых рэчываў спартоўцамі, могуць быць адхіленыя. Пераправеркі допінг-пробаў Пекіна-2008 і Лондана-2012, ініцыяваная Міжнародны алімпійскім камітэтам (МАК), паказала, што такіх краін дзевяць.
У пералік каманд, якія, імаверна, будуць адхіленыя ад спаборніцтваў, уваходзіць і беларуская зборная, 7 членаў якой былі абвінавачаныя ў допінгу.
Акрамя Беларусі, турнір могуць прапусціць каманды Кітая, Казахстана, Арменіі, Азербайджана, Расіі, Малдовы, Украіны і Турцыі.
Чэмпіянат свету па цяжкай атлетыцы пройдзе з 28 лістапада па 5 снежня ў амерыканскім Анахайме.
