У выхадныя сіноптыкі прагназуюць моцны вецер і мокры снег з дажджом
У паўночных і цэнтральных раёнах краіны чакаецца ўзмацненне заходняга ветру парывамі да 15—20 м/с, які будзе суправаджацца мокрым снегам і дажджом. Умовы надвор'я на тэрыторыі Беларусі будуць вызначаць атмасферныя франты ад цыклону з цэнтрам над поўначчу Скандынавіі, які ў далейшым зрушыцца на Верхнюю Волгу, піша БелаПАН.
Пра гэта паведаміў начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Дзмітрый Рабаў.
У суботу, 26 лістапада, ноччу па паўночнай палове, днём на большай частцы тэрыторыі краіны кароткачасовыя ападкі (мокры снег, дождж), слабы галалёд, ноччу і раніцай месцамі на дарогах галалёдзіца. Па поўдні слабы туман. Вецер заходні, паўднёва-заходні 5—10 м/с, парывы да 14 м/с, раніцай і днём у паўночных і цэнтральных раёнах парывы да 15—20 м/с. Тэмпература ноччу мінус 4 — плюс 1°С, днём плюс 1—7°С.
У Мінску воблачна, кароткачасовыя ападкі (мокры снег, дождж), слабы галалёд, ноччу і раніцай месцамі на дарогах галалёдзіца. Вецер заходні, паўднёва-заходні 5—10 м/с, ноччу парывы да 14 м/с, днём парывы да 15—18 м/с. Тэмпература ноччу 0 — мінус 2°С, днём плюс 1—3°С.
У нядзелю, 27 лістапада, на большай частцы тэрыторыі ападкі (мокры снег, дождж). Ноччу і раніцай у асобных раёнах слабы галалёд, на дарогах галалёдзіца. Ноччу ў паўночных і цэнтральных раёнах узмацненне ветру парывамі да 15—20 м/с. Тэмпература ноччу мінус 2 — плюс 4°С, днём мінус 1 — плюс 5°С.
У Мінску воблачна, кароткачасовыя ападкі (мокры снег, дождж), слабы галалёд, ноччу і раніцай месцамі на дарогах галалёдзіца. Вецер заходні, паўднёва-заходні 5—10 м/с, ноччу парывы да 15—18 м/с, днём да 14 м/с. Тэмпература ноччу плюс 1—3°С, днём каля 3°С цяпла.
«Далей пахаладае У пачатку наступнага тыдня ўслед за халодным фронтам на тэрыторыю краіны чакаецца паступленне халодных паветраных мас арктычнага паходжання з поўначы Еўропы, што прывядзе да паніжэння тэмпературы паветра», — паведаміў Рабаў.
У панядзелак, 28 лістапада, на большай частцы тэрыторыі кароткачасовы снег, слабая мяцеліца. На асобных участках дарог галалёдзіца. Раніцай і днём па захадзе ўзмацненне ветру парывамі да 15—18 м/с. Тэмпература паветра на працягу сутак 0 — мінус 7°С.
