Віяланчэль і смерць: калі я застануся
Жанр: драма
Рэжысёр: Р. Дж. Катлер
У ролях: Хлоя Грэйс Морыц, Мірэй Інас, Джэймі Блэклі, Джошуа Леанард, Ліана Ліберата, Стэйсі Кіч, Габрыэль Роз, Джэйкаб Дэйвіс, Алі Мілнер
ЗША, 106 хв.
Мія — таленавітая дзяўчына, закаханая ў класічную музыку, у сваю віяланчэль і ў рокера Адама.
Пасля аўтакатастрофы Мія аказваецца ў коме. Пакуль цела дзяўчыны ляжыць у шпіталі, яе душа павінна вырашыць, хоча яна жыць далей ці лепш адправіцца ў іншы свет следам за сваімі роднымі. Пакуль дактары ратуюць яе цела, яна ўспамінае сваё жыццё і дарагіх людзей, якія загінулі ў гэты дзень, спрабуючы зачапіцца за тых, хто не пакінуў яе цяпер.
Фільм зняты па матывах аднайменнай кнігі Гейл Форман, амерыканскай журналісткі, якая спецыялізуецца на маладзёжных тэмах, аўтаркі некалькіх кніг у жанры young adult.
Ад іншых твораў у падобным жанры кнігі і фільм адрозніваюць сур'езны падыход да жыцця гераіні Міі, надзвычай адоранай віяланчэлісткі. Твор прасякнуты музыкай — класічнай і рокам 80—90-х — што стварае глебу для прыемнага саўндрэка — дзеля яго аднаго варта паглядзець кіно.
Нягледзечы на падлеткавую тэматыку, фільм зачэпіць вялікую аўдыторыю.
Найперш гэта цікавая гісторыя станаўлення маладых талентаў, звязаных паміх сабою каханнем. Цёплы, добры фільм пра сям'ю і вялікія страты ў жыцці.
