За парушэнне правілаў стаянкі будуць караць не кіроўцу, а ўласніка аўто
Сёлета ДАІ рыхтуе важнае новаўвядзенне. За парушэнне правілаў стаянкі (няправільную паркоўку) будуць караць не кіроўцу, а ўласніка аўто.
Пра гэта паведаміў кіраўнік беларускага ДАІ Юрый Літвін падчас прамой лініі газеты «Транспартны веснік».
Падобнага правіла супрацоўнікі ДАІ прытрымліваюцца пра пакаранні за перавышэнне хуткасці, зафіксаванае камерамі фота- і відэафіксацыі.
Вызначэнне парушальніка правілаў паркоўкі на дадзены момант - прававая дзірка ў заканадаўстве. Супрацоўнік ДАІ мусіць даказаць, што аўтамабіль прыпаркаваў у забароненым месцы канкрэтны грамадзянін. Аднак кіроўцы, якія вяртаюцца да няправільна прапаркаванай машыны, карыстаюцца ўніверсальным адказам: «Паркаваў машыну не я, а кум/брат/сват». А прамых доказаў іх віны звычайна бракуе.
Апроч таго, паводле словаў Юрыя Літвіна, будзе ўведзенае абавязковае выкарыстанне зімовай гумы і дзіцячых крэслаў.
