Ciažarnuju žycharku Minska asudzili za ŭdzieł u «Maršy hierojaŭ»
U sudzie Leninskaha rajona Minska 27 sakavika asudzili Juliju Karalovu pavodle č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich) Kryminalnaha kodeksa. Sudździa Julija Inčyna pryznačyła Karalovaj dva hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaj chimii»), daviedałasia «Viasna».
Žančynu abvinavacili va ŭdziele ŭ «Maršy hierojaŭ» 13 vieraśnia 2020 hoda ŭ Minsku i vychadzie na prajeznuju častku. Jak paviedamlajecca ŭ sudovaj pastanovie, Julija na plačach niesła bieł-čyrvona-bieły ściah i pakazvała rukoju znak V. Na sudzie žančyna paviedamiła, što vychodziła sa znajomymi na prajeznuju častku, kab sfatahrafavacca.
Minčanku apaznali pa fotazdymku z akcyi pratestu i z dapamohaj danych mabilnaha apieratara ab telefonnych złučeńniach jaje abanienckaha numara.
Akramia hetaha, u sudovaj pastanovie paviedamlajecca pra «aktyŭnaje spryjańnie vykryvańniu inšych udzielnikaŭ złačynstva» z boku Julii. Nibyta žančyna padała asabistyja danyja inšych udzielnikaŭ Maršu, jakija byli razam ź joju na fotazdymku. Jaje advakat prasiŭ uličyć hety fakt i źmiakčyć pakarańnie. Ale sud admoviŭ, bo, maŭlaŭ, «abvinavačvanaja paznačyła tolki abstaviny ździejśnienaha joju złačynstva».
Da suda Julija Karalova znachodziłasia pad zakładam pamieram 18500 rubloŭ. Padčas śledstva na kavamašynu žančyny nakłali aryšt, jakuju paśla abviaščeńnia prysudu viarnuli.
Julija Karalova maje vyšejšuju adukacyju, pracuje dyrektarkaj tavarystva z abmiežavanaj adkaznaściu, haduje niepaŭnaletniaje dzicia. Na momant suda jana znachodziłasia ŭ stanie ciažarnaści.
Čytajcie taksama:
Žychara Mahilova asudzili da dvuch hadoŭ kałonii za kamientar pad fota Łukašenki
U Homieli za «ekstremizm» asudzili vykładčycu ŭniviersiteta transpartu
Papularnuju homielskuju fatohrafku sudzili pa dvuch kryminalnych palityčnych artykułach
