Sudździa, jakaja vynosiła prysud Cichanoŭskamu, prasiłasia viarnucca na pracu ŭ KDB. Ale jaje nie ŭziali
Z bazy danosaŭ, jakuju vykłali Kibierpartyzany, stała viadoma pra historyju byłoj homielskaj sudździ Aleny Šajn, jakaja pisała ŭ Centralny aparat KDB Biełarusi. U samy razhar pratestaŭ jana chacieła tudy pracaŭładkavacca.
Zvarot Šajn vyjaviŭ «Fłahštok».
Alena Šajn sprava.
Žančyna adrasavała svoj list pieršamu namieśniku staršyni KDB Siarhieju Cierabovu, jaki raniej pracavaŭ načalnikam UKDB pa Homielskaj vobłaści. U zvarocie, datavanym 9 vieraśnia 2020 hoda, sudździa prasiła Cierabava ab asabistym pryjomie i razhladzie pytańnia jaje pracaŭładkavańnia.
Šajn napisała, što z 2009 da 2015 hoda jana prachodziła słužbu ŭ orhanach dziaržaŭnaj biaśpieki. Paśla była zvolnienaja ŭ zapas, bo Łukašenka pryznačyŭ jaje sudździoj. Ale ŭ 2019 hodzie žančyna zachacieła viarnucca nazad na słužbu ŭ KDB — paśla zakančeńnia piacihadovaha terminu paŭnamoctvaŭ sudździ.
«Heta rašeńnie kadravym padraździaleńniem Upraŭleńnia było ŭzhodnienaje z Vami (Siarhiejem Cierabavym — NN), i mnie było paviedamlena kiraŭnictvam kadravaha padraździaleńnia, što Vy paličyli maju kandydaturu hodnaj. U dalejšym ja prajšła ŭsie etapy, praduhledžanyja dla kandydata na słužbu, nie maju miedycynskich supraćpakazańniaŭ, nie ździajśniała dyskredytujučych učynkaŭ, stanoŭča charaktaryzavałasia jak padčas pracy śledčym, tak i sudździoj, kiraŭnictva UKDB pa Homielskaj vobłaści chadajničała ab pryjomie mianie na słužbu».
Adnak 1 vieraśnia 2020 hoda Šajn daviedałasia, što ŭ pryjomie na słužbu ŭ orhany dziaržbiaśpieki joj admovili, «bo heta pryznana niemetazhodnym».
Tamu jana paprasiła Cierabava «zapatrabavać z UKDB pa Homielskaj vobłaści» jaje asabistuju spravu i chadajničać pierad tahačasnym staršynioj Kamiteta Valeryjem Vakulčykam ab pierahladzie kadravaha pytańnia.
«Ja źjaŭlajusia kvalifikavanym jurystam, vałodaju vysokim abjomam viedaŭ i praktyčnych navykaŭ, jakija chaču prymianiać, vyrašajučy, u miežach kampietencyi, zadačy, jakija stajać pierad Kamitetam dziaržaŭnaj biaśpieki. Ja hanarusia tym, što źjaŭlajusia aficeram zapasu, ščyra žadaju praciahnuć słužbu. Miarkuju, što pa svaich maralna-dziełavych jakaściach ja zdolnaja hodna dać rady słužbovym abaviazkam, kali mnie budzie akazany vysoki davier. U svaju čarhu, hatovaja słužyć na toj pasadzie i toj miascovaści, dzie heta budzie maksimalna adpaviadać metam i zadačam orhanaŭ dziaržaŭnaj biaśpieki», — napisała pra siabie Šajn.
Adnak usio heta nie dapamahło, i zamiest taho, kab «adpaviadać metam i zadačam orhanaŭ dziaržbiaśpieki» byłaja sudździa syšła ŭ dekret. U kancy 2022 hoda jana zhadvajecca jak viadučy śpiecyjalist apieratyŭnaha adździaleńnia štaba UUS Homielskaha abłvykankama, člen piarvičnaj arhanizacyi Biełaruskaha sajuza žančyn.
Alena Šajn źviazanaja ź niekalkimi palityčnymi spravami. U 2021 hodzie jana prachodziła paciarpiełaj pa spravie suprać hrodzienca, jakoha abvinavacili ŭ abrazie pradstaŭnika ŭłady i pryznačyli pakarańnie ŭ vyhladzie 4,5 hadoŭ kałonii ŭzmocnienaha režymu. Šajn atrymała ad jaho 1500 rubloŭ materyjalnaha kampiensavańnia maralnaj škody za kamientar u internecie i pieradała ich u dziciačuju balnicu.
Padčas pracy ŭ sudzie Savieckaha rajona Homiela Šajn vynosiła abvinavaŭčyja pastanovy pa palityčna matyvavanych spravach. Jana prysudziła nie mienš za 37 sutak aryštu i 920 rubloŭ štrafu. U 2017 hodzie jana sudziła žurnalista Jaŭhiena Mierkisa za strym kala budynka suda i aštrafavała jaho.
U pačatku 2020 hoda Alena Šajn sudziła Siarhieja Cichanoŭskaha. Padčas pracesu jon spytaŭ u sudździ, ci praŭda, što jana pracuje ŭ KDB. Šajn nie adkazała na pytańnie i prysudziła Cichanoŭskamu administracyjny aryšt.
Zapomniłasia jana i jak minimum adnym spraviadlivym rašeńniem. Mienavita Šajn u 2016 hodzie spyniła administracyjnuju spravu ŭ dačynieńni da žurnalistki Łarysy Ščyrakovaj (ciapier asudžanaj pa kryminalnych artykułach, pryznana palitviaźniem). A tady milicyja skłała na Ščyrakovu pratakoł za pracu biez akredytacyi na telekanał «Biełsat», adnak dokazaŭ nie pradstaviła. U vyniku Šajn pahadziłasia z dovadami žurnalistki i spyniła spravu.
