Natalla Ejsmant pra «kanfiederacyju»: My idziom na ekanamična metazhodnyja kroki. Ale niezaležnaść — śviatoje
Pres-sakratar Alaksandra Łukašenki Natalla Ejsmant prakamientavała «Našaj Nivie» infarmacyju ab mahčymaj prahramie ekanamičnaj intehracyi Biełarusi i Rasii, jakuju raspaŭsiudziŭ rasijski «Kamiersant».
Ci možna aceńvać heta jak ukid, a kali nie, to jak hramadstvu razumieć frazy ab «bolš čym kanfiederacyi»?
«Usie hučnyja terminy, jakija vykarystoŭvajucca ŭ pryviedzienym artykule, — kanfiederacyja, fiederacyja i h.d. — my b prapanavali aceńvać jak pustyja žurnalisckija štampy. U cełym ža ŭ intehracyjnaj rabocie, jakaja ciapier viadziecca, baki sychodziać z tych realij, jakija majuć, heta značyć z dasiahnutaha ŭzroŭniu ŭzajemadziejańnia», — miarkuje Natalla Ejsmant.
Jana padkreśliła, što ŭ asnovie lubych pracesaŭ lažyć tezis ab niezaležnaści Biełarusi i Rasii.
«Heta śviatoje! Čyrvonyja ściažki — heta suvierenitet i niezaležnaść kožnaj z krain. U intehracyjnych pracesach my idziom na tyja kroki, jakija ekanamična metazhodnyja. Nijakich sumiesnych orhanaŭ nie stvarajecca — da hetaha krainy nie hatovyja», — padkreślivaje pres-sakratar.
Jana nahadała, što na ŭzroŭni viedamstvaŭ u Biełarusi i Rasii vydatna naładžana rabota sumiesnych kalehij, efiektyŭna pracujuć Parłamiencki schod, Sajuzny Saŭmin, Vyšejšy dziaržsaviet Sajuznaj dziaržavy. «Heta tyja orhany, praź jakija, pavodle damoŭlenaściaŭ prezidentaŭ, vyrašajucca i buduć vyrašacca pytańni dvuchbakovych adnosin», — miarkuje jana.
«Što tyčycca pytańnia ab «ukidzie» — prahrama stanie prahramaj tolki tady, kali jaje padpišuć prezidenty i jana budzie pryniata na vyšejšym Dziaržsaviecie ŭ śniežni — znoŭ ža, kali baki buduć da hetaha hatovyja. Pakul praca praciahvajecca, ab usich inšych padrabiaznaściach my prapanujem źviartacca da tych, chto hetuju infarmacyju «źliŭ», — padsumavała Natalla Ejsmant.
«Kommiersant» daviedaŭsia płan intehracyi Biełarusi i Rasii: Maskva choča ekanamičnaha pahłynańnia
