Sud u Čarnihavie pakinuŭ biełaruskaha «špijona» pad aryštam da 7 kastryčnika
Hramadzianin Biełarusi, zatrymany sioleta ŭ červieni ŭ Čarnihavie z padazreńnia ŭ špijanažy na karyść Rasiei, zastaniecca pad aryštam da 7 kastryčnika ŭ śledčym izalatary Słužby biaśpieki Ŭkrainy.
Adpaviednaje rašeńnie ŭchvaliŭ Dziaśnianski rajonny sud Čarnihava. Adnačasova namieśnik prakurora Čarnihaŭskaj vobłaści padoŭžyŭ termin dasudovaha raśśledavańnia spravy «špijona-biełarusa» da 16 kastryčnika.
Padčas razhladu adpaviednaha chadajnictva pra padaŭžeńnie terminu aryštu, padazravany biełarus zajaviŭ, što dasudovaje raśśledavańnie naŭmysna zaciahvajecca, śledčyja dziejańni nie pravodziacca, a ŭsie padazreńni hruntujucca tolki na zdahadkach śledčaha. Jon taksama prasiŭ sud vyzvalić jaho z-pad varty, pakolki nia maje namieru chavacca ad śledčych orhanaŭ.
U svaju čarhu śledčy paviedamiŭ, što dla zaviaršeńnia dasudovaha raśśledavańnia treba pravieści vialikuju kolkaść śledčych dziejańniaŭ — dapytać śviedak, jakija vałodajuć źviestkami ab ažyćciaŭleńni padazravanym vyviednaj dziejnaści na terytoryi Ŭkrainy; pravieści adnačasovyja dopyty pamiž padazravanym i śviedkami, atrymać vyniki pryznačanych sudovych ekspertyzaŭ, u tym liku ab najaŭnaści źviestak, jakija majuć status dziaržaŭnaj tajny, a taksama ambulatornaj sudova-psychijatryčnaj ekspertyzy padazravanaha.
U časie sudovaha pasiedžańnia śledčy paviedamiŭ, što Ŭkraina źviarnułasia da «kampetentnych orhanaŭ Biełarusi» pra akazańnie mižnarodnaj pravavoj dapamohi. Pavodle jaho, mienavita składanaść spravy jość hałoŭnaj pryčynaj praciahłaha dasudovaha raśśledavańnia.
Sud taksama pryznaŭ, što materyjały kryminalnaj spravy paćviardžajuć abhruntavanaść padazreńnia hramadzianina Biełarusi va ŭčynieńni asabliva ciažkaha złačynstva, jakoje praduhledžvaje biezalternatyŭnaje pakarańnie ŭ vyhladzie pazbaŭleńnia voli na termin ad 10 da 15 hadoŭ.
Supracoŭniki ŭpraŭleńnia Słužby biaśpieki Ŭkrainy ŭ Čarnihaŭskaj vobłaści 16 červienia zatrymali hramadzianina Biełarusi z padazreńnia ŭ zbory infarmacyi, jakaja składaje dziaržaŭnuju tajamnicu, i jaje pieradačy Rasiei. 19 červienia jaho pieraviali ŭ izalatar SBU ŭ Kijevie.
Proźvišča biełarusa śledztva nie ŭdakładniaje. Viadoma tolki, što jon niežanaty, nidzie nie pracuje, maje na ŭtrymańni baćku-pensijanera i raniej nie pryciahvaŭsia da kryminalnaj adkaznaści.
