Minžyłkamhas: Taryfy na ŽKP nievysokija, nasielnictva zdolna ich apłačvać biez subsidyj
Bieznajaŭnyja žyllovyja subsidyi na apłatu ŽKP u pieršym paŭhodździ atrymali 11 tysiač biełarusaŭ. Ahulnaja suma padtrymki skłała 330 tysiač rubloŭ, paviedamlaje STV. U Minžyłkamhasie ličać, što «taryfy ŭ nas nievysokija, nasielnictva zdolna apłačvać žyllova-kamunalnyja pasłuhi biez pryciahnieńnia bieznajaŭnych žyllovych subsidyj».
Ad 1 kastryčnika minułaha hoda ŭ Biełarusi pačała pracavać novaja sistema pradastaŭleńnia dziarždapamohi na apłatu žyllova-kamunalnych pasłuh, nahadvaje tut.by. Bieznajaŭnyja žyllovyja subsidyi, ukaz ab uviadzieńni jakich padpisaŭ prezident u kancy žniŭnia minułaha hoda, źjavilisia ŭ žyroŭkach biełarusaŭ užo ź listapada.
Bieznajaŭnuju subsidyju možna atrymać na ŭsie asnoŭnyja ŽKP, u tym liku aciapleńnie, i vydatki, jakija viartajucca (aśviatleńnie dapamožnych pamiaškańniaŭ, lift). Usio, što znachodzicca ŭ žyroŭcy pad hrafoj «Dadatkovyja pasłuhi», a taksama spažyvańnie asnoŭnych ŽKP zvyš normy nie ŭličvajucca padčas raźliku dziarždapamohi. Tamu, kali čałaviek vydatkavaŭ za miesiac bolš pakładzienaha, jamu daduć subsidyi tolki na tuju sumu, jakaja pakryvaje normu. Usio astatniaje pryjdziecca apłačvać samomu.
Subsidyi dajuć, kali na apłatu žyroŭki (bieź pieravyšeńnia narmatyvaŭ spažyvańnia) budzie sychodzić bolš za 20% prybytku haradskoj abo 15% prybytku viaskovaj siamji.
- Bieznajaŭnyja žyllovyja subsidyi da 15 rubloŭ atrymali kala 60% z hetych 11 tysiač, bolš za 15 rubloŭ - astatnija hramadzianie. Čas pakazaŭ, što, sapraŭdy, taryfy ŭ nas nievysokija, nasielnictva zdolna apłačvać žyllova-kamunalnyja pasłuhi biez pryciahnieńnia hetych bieznajaŭnych žyllovych subsidyj. Usio ž taki 11 tysiač čałaviek - heta zusim nie vysokaja ličba, - zajaviŭ načalnik upraŭleńnia ekanomiki Ministerstva žyllova-kamunalnaj haspadarki Dźmitryj Kazanoŭski.
Raniej u Biełarusi pierahledzieli normy spažyvańnia niekatorych ŽKP dla raźliku bieznajaŭnych subsidyj, u tym liku pavialičyli narmatyŭ na techabsłuhoŭvańnie lifta i spažyvańnie elektraenierhii, jakaja vykarystoŭvajecca na pracu liftaŭ.
Nahadajem, KDK padrychtavaŭ prapanovy pa źnižeńni sabiekoštu žyllova-kamunalnych pasłuh u Biełarusi na 7,3%.
U minułym hodzie ŭ KDK raspaviadali ab nieabhruntavanym pavieličeńni taryfaŭ na ŽKP i pierapłatach nasielnictva. Paźniej rabočaja hrupa Kamiteta dziaržkantrolu vypracavała prapanovy pa źnižeńni vydatkaŭ na žyllova-kamunalnyja pasłuhi i pavyšeńni akupnaści pasłuh z boku nasielnictva.
Raniej namieśnik premjer-ministra Anatol Kalinin zajaŭlaŭ, što taryfnaja palityka ŭ śfiery žyllova-kamunalnaj haspadarki pavinna adpaviadać uzroŭniu dachodaŭ nasielnictva.
Da kanca hetaha hoda biełarusy buduć kampiensavać 75% vydatkaŭ na žyllova-kamunalnyja pasłuhi, a da kanca 2018 hoda - 100%.
