«Ja viedaju absalutna razumnych i patryjatyčnych čynoŭnikaŭ»
Piša Maksim Machańkoŭ.
Raniej ja absalutna ščyra vieryŭ u toje, što amal usie biełaruskija čynoŭniki — biezydejnyja viertykalščyki, jakija varoža staviacca da ŭsiaho biełaruskaha. Užo potym ja zrazumieŭ, što heta zusim nie tak. Adsotak razumnych i patryjatyčnych ludziej siarod biełaruskaha čynavienstva nie taki vysoki, jak chaciełasia b, ale i nie taki mizerny, jak ja dumaŭ. I pry inšym dziaržaŭnym kursie hetyja ludzi mahli b być dobrymi kiraŭnikami i prynosić realnuju karyść Baćkaŭščynie.
Ja dobra viedaju dvuch takich čynoŭnikaŭ. Imiony nazyvać nie budu. Adzin sa Staradarožčyny, druhi z Salihorščyny.
Toj, jaki sa Staradarožčyny — ščyry i addany patryjot krainy, čałaviek adukavany, dobra razumieje mastactva i całkam apantany Biełaruščynaj. A jaho miłahučnaja biełaruskaja mova začaroŭvaje. Praŭda, ja nie sustrakaŭ siarod inšych, navat siarod fiłołahaŭ i linhvistaŭ, ludziej z takim sakavitym i čystym biełaruskim vymaŭleńniem. Kali ŭ anhličan jość Ściven Fraj, čyjo vymaŭleńnie ličycca ŭ Brytanii ŭzornym dla anhlijskaj movy, to ŭ biełarusaŭ jość hety staradarožski čynoŭnik, jakomu možna tolki filmy i aŭdyjoknihi ahučvać.
Salihorski čynoŭnik nie mienšy patryjot Biełarusi. Jon viedaje amal usio pa historyi Biełarusi. Čałaviek davoli skieptyčna stavicca da ŭsich našych susiedziaŭ, ale tolki tamu, što žyvie vyklučna intaresami Biełarusi. Hety čynoŭnik mała što vyrašaje, ale duša ŭ jaho balić za Biełaruś.
Dyk voś, da čaho heta ja? Ja upeŭnieny, što takich čynoŭnikaŭ u Biełarusi šmat. I kali b sapraŭdy isnavaŭ niejki kurs na «miakkuju biełarusizacyju», hetyja ludzi ŭžo siabie b prajavili. Usie my razumiejem, jak pracuje biełaruskaja «viertykal». Kali b byŭ niejki popyt na «miakkuju biełarusizacyju» z boku centralnaj ułady, to hetyja čynoŭniki chucieńka prynialisia b za biełarusizacyju, bo ŭ ich jość nie tolki administratyŭny resurs, ale i mocnaje žadańnie hetuju samuju biełarusizacyju pravieści. Ale za apošnija niekalki hadoŭ u dziejnaści hetych čynoŭnikaŭ faktyčna ničoha nie źmianiłasia. Admaški na biełarusizacyju nie było, tamu ja i sumniavajusia, što isnuje metanakiravanaja i sankcyjanavanaja ŭładami «miakkaja biełarusizacyja».
Bo kali jana nasamreč isnuje, čamu ž hetyja patryjoty-čynoŭniki nie prynialisia biełarusizavać usio navokał?
Dobra, kali ja pamylajusia.
