Pucin pieradaŭ FSB kantrol nad miažoj Biełarusi? Pahraničny kamitet: Heta łuchta
Niekatoryja vydańni pačali raspaŭsiudžvać infarmacyju, zhodna ź jakoj «Pucin pieradaŭ FSB kantrol nad hranicaj Sajuznaj dziaržavy».
Raspaŭsiudniki takoj infarmacyi spasyłajucca na dakumient ad 9 žniŭnia. U im havorycca pra ŭniasieńnie źmianieńniaŭ i dapaŭnieńniaŭ u pahadnieńnie pamiž Biełaruśsiu i Rasijaj ab sumiesnaj achovie pavietranych hranic h.zv. Sajuznaj dziaržavy i stvareńnia adzinaj sistemy supraćpavietranaj abarony.
Toje pahadnieńnie pamiž krainami padpisanaje jašče ŭ 2009 hodzie, ratyfikavana biełaruskim bokam u 2016-m — tak doŭha baki nie mahli pryjści da zhody, kab pahadnieńnie zapracavała.
Faktyčna nijakich źmianieńniaŭ u isnaj sistemie abarony miežaŭ nie płanujecca — u prajekcie viadziecca havorka pra zamienu asobnych farmulovak: «vajenna-pavietranyja vojski Rasii» na «pavietrana-kaśmičnyja vojski Rasii».
Ź istotnaha — dadajecca važnaja farmuloŭka: «Paradak užyvańnia zbroi i bajavoj techniki dziažurnymi pa supraćpavietranaj abaronie siłami vyznačajecca zakanadaŭstvam krainy, na terytoryi jakoj užyvajecca zbroja i bajavaja technika».
Voś jak prakamientavaŭ situacyju vajskovy ekśpiert Alaksandr Alesin.
«Pierakručanyja paviedamleńni ŚMI — heta śledstva vysokaj śpioki, ja tak dumaju, — skazaŭ jon. — Sens tam taki — pahadnieńnie ab stvareńni adzinaj sistemy SPA padpisanaje ŭ 2009 hodzie, ale jaho niemahčyma vykonvać, bo niama padzakonnych aktaŭ, jakija apisvajuć paradak funkcyjanavańnia sistemy: jakaja čaści buduć zadziejničany, jak budzie ažyćciaŭlacca kamandavańnie i dziažurstva, jak stvarajecca štab i hetak dalej. Z tych samych časoŭ išoŭ praces urehulavańnia supiarečnaściaŭ. Kaniečnie, Rasija chacieła bolš pravoŭ atrymać, daminavać, ale Łukašenka nie pahadžaŭsia, tamu my ratyfikavali tolki ŭ 2012 hodzie. Dalej idzie paradak kamandavańnia — pieršym kamandziram byŭ pryznačany hienierał Dvihaloŭ u 2013 hodzie. Ale heta nie dapamahło. Pytańnie było ŭ tym — kali ŭ našuju pavietranuju prastoru praniknie niejki abjekt, chto budzie addavać zahad na ataku? Prezident? Kamandujučy adzinaj rehijanalnaj sistemaj? Dzie budzie znachodzicca centralny kamandny punkt, pieradavy kamandny punkt? Tamu bačycie, jany pryjšli da vysnovy, što kiravać tymi čaściami buduć pa-raniejšamu nacyjanalnyja kamandavańni. Ale kali ŭźniknie pieryjad, «papiaredni niepasrednaj ahresii», to jany piarojduć pad kiravańnie adzinaj sistemy. Ale i tut nie źniatyja ŭsie supiarečnaści. Kožny hety dakumient tłumačyć pa-svojmu. Tamu, da listapada 2016 hoda baki nie mahli zastupić na sumiesnaje dziažurstva. I ci zastupili siońnia? Tamu nie treba interpretavać hetuju papieru jak śviedčańnie, što zaŭtra Rasija budzie achoŭvać našuju hranicu z Ukrainaj, a my — hranicu Rasii ź Finlandyjaj. Tam havorka nie pra heta».
Darečy, u dakumiencie niama ni słova pra FSB — havorka idzie pra pavietranyja hranicy.
«FSB? Heta poŭnaja łuchta. Jak my vykonvajem svaje zadačy pa achovie hranic, tak i budziem vykonvać. Pakolki Biełaruś vałodaje svaimi nacyjanalnymi ŭzbrojenymi siłami, to jaje hranicy znachodziacca pad achovaj pahraničnych orhanaŭ Biełarusi. Pres-słužbie Dziaržpahrankamiteta nie viadoma pra płany pierachodu našaha viedamstva pad čužoje kiravańnie», — prakamientavaŭ situacyju «Našaj Nivie» pres-sakratar Pahraničnaha kamiteta Anton Byčkoŭski.
Razam z hetym treba dadać, što mahčymaść takich interpretacyj — śledstva aściarohaŭ, što paśla sumiesnych vučeńniaŭ «Zachad-2017» rasijskija vojski mohuć zastacca ŭ Biełarusi, nie zvažajučy na zhodu ŭładaŭ Biełarusi.
