Były načalnik ekzamienacyjnaha adździeła DAI Pinska pojdzie pad sud za chabar
USK pa Bresckaj vobłaści paviedamiła pra zaviaršeńnie rasśledavańnia kryminalnaj spravy ŭ dačynieńni 52-hadovaha byłoha kiraŭnika Mižrajonnaha rehistracyjna-ekzamienacyjnaha adździeła (MREA) DAI horada Pinska pa č. 2 art. 424 (złoŭžyvańnie ŭładaj), č. 2 art. 430 (atrymańnie chabaru, paŭtorna) Kryminalnaha kodeksa Respubliki Biełaruś.
Były načalnik abvinavačvajecca ŭ tym, što ŭ pieryjad z 2014-ha pa 2016 hod atrymlivaŭ chabar za atrymańnie stanoŭčaha vyniku pry zdačy kvalifikacyjnych ekzamienaŭ. Pry hetym asoby, jakija źviartalisia za padobnaj pasłuhaj, nieadnarazova nie mahli prajści tearetyčnaje vyprabavańnie.
Pieršapačatkova vyklikaŭ padazreńnie fakt paśpiachovaj zdačy mužčynam ekzamienaŭ u Pinsku, paśla 8 niaŭdałych sprobaŭ u Breście. U suviazi z hetym pačałosia raźbiralnictva.
U ramkach śledstva stała viadoma pra 4 fakty, kali były daišnik braŭ sumy u pamiery da 250 dalaraŭ ZŠA. Akramia taho, viadomyja 11 epizodaŭ sadziejničańnia ekzamienujemym pry testavańni na kampjutary z karyści abo inšaj zacikaŭlenaści.
Jašče dvuma fihurantami dadzienaj schiemy vystupali byłyja kalehi abvinavačanaha. Tak, 57-hadovy žychar Pinskaha rajona i 65-hadovy žychar Pinska, pavodle śledstva, padbuchtorvali da chabaru 25 hramadzian, jakija žadali atrymać vadzicielskija paśviedčańni pry farmalnym prachodžańni ekzamienaŭ. Zatym jany pieradavali častku atrymanych takim čynam hrošaj słužbovaj asobie MREA. Im inkryminujuć złačynstvy, praduhledžanyja art. 431 (dača chabaru) KK.
Materyjały kryminalnaj spravy nakiravanyja ŭ sud.
