Heta było nie ŭ prytonie: SK paviedamiŭ padrabiaznaści zatrymańnia ŭ Viciebsku «śviatara-suteniora»
Śledčy kamitet raskryŭ padrabiaznaści zatrymańnia ŭ Viciebsku pravasłaŭnaha śviatara adnaho z chramaŭ Leninhradskaj vobłaści. Pavodle infarmacyi SK śviatara zatrymali na aŭtavakzale, a nie ŭ prytonie.
«Viciebskim haradskim adździełam Śledčaha kamiteta Respubliki Biełaruś rasśledujecca kryminalnaja sprava ŭ dačynieńni da hramadzianina Rasii, pavodle prykmietaŭ złačynstva, praduhledžanaha č.1 art.14, č.2 art.171 Kryminalnaha kodeksa Respubliki Biełaruś (zamach na arhanizacyju i vykarystańnie zaniatku prastytucyjaj inšaj asobaj, spałučanyja z vyvazam za miežy dziaržavy asoby dla zaniaćcia prastytucyjaj).
Padstavaj dla raspačynańnia kryminalnaj spravy pasłužyli materyjały, jakija pastupili ad supracoŭnikaŭ pa supraćdziejańni niezakonnamu abarotu narkotykaŭ i handlu ludźmi orhanaŭ unutranych spraŭ Viciebska.
Ustanoŭlena, što žychar Leninhradskaj vobłaści, 1978 h.n., znachodziačysia na terytoryi h. Viciebska, šlacham uhavoraŭ i abiacańniaŭ sprabavaŭ arhanizavać vyvaz u h. Sankt-Pieciarburh dla zaniatku prastytucyjaj dźviuch žycharak h. Viciebska. Davieści svoj namier da kanca jon nie zmoh, bo 3 žniŭnia paśla 17 hadzin byŭ zatrymany supracoŭnikami orhanaŭ unutranych spraŭ.
Padazravanaha razam z 20-hadovaj i 30-hadovaj žančynami zatrymali ŭ rajonie aŭtavakzała ŭ Viciebsku ŭ momant pasadki ŭ aŭtobus, jaki nakiroŭvaŭsia ŭ Sankt-Pieciarburh.
Śledčyja pravodziać pieršapačatkovyja śledčyja dziejańni, nakiravanyja na vyśviatleńnie abstavinaŭ incydentu. Padazravany dapytany. Śledčyja buduć chadajničać ab prymianieńni da jaho miery strymańnia ŭ vyhladzie zaklučeńnia pad vartu, havorycca ŭ infarmacyi SK
***
Nahadajem, što 5 žniŭnia vydańnie 47news paviedamiła, što ŭ Viciebsku pry šturmie prytonu z prastytutkami byŭ zatrymany śviatar ź Leninhradskaj vobłaści Rasii. Pry adjeździe sa svajho chrama 2 žniŭnia jon raspavioŭ, što źbirajecca naviedać manastyr u Padmaskoŭi. Svajoj žoncy ajciec Mikałaj (Mikałaj Kirejeŭ) ničoha nie paviedamiŭ, i taja praź niekalki dzion źviarnułasia ŭ palicyju.
