Byłoha načalnika Vietkaŭskaha RAUS asudzili za źbićcio padletka
Sud Čyhunačnaha rajonu Homla vynies prysud u dačynieńni byłoha načalnika Vietkaŭskaha RAUS padpałkoŭnika milicyi Ŭładzisłava Antonienki. Pavodle častki 1 artykułu 339 Kryminalnaha kodeksu jon pryznany vinavatym u chulihanstvie i aštrafavany za źbićcio padletka Vadzima Šremava na 30 bazavych vieličyniaŭ, što składaje 690 rubloŭ.
Namieśnik prakurora paprasiŭ pryznačyć byłomu načalniku RAUS pakarańnie štrafam u 40 bazavych vieličyniaŭ. Mierkavaŭ, što treba ŭličyć ščyraje raskajvańnie Antonienki, jahonuju nehatyŭnuju acenku svajho ŭčynku, adsutnaść zasudnaści i navat administracyjnaha pakarańnia, a taksama najaŭnaść dvaich niepaŭnaletnich dziaciej. Abciažlivyja abstaviny — niećviarozy stan, ale, jak ličyć dziaržaŭny abvinavaŭca, jość daravańnie paciarpiełaha i jaho maci, «vina pierad imi zahładžanaja».
Sam Uładzisłaŭ Antonienka zajaviŭ, što jamu niama čaho skazać u svaju abaronu. Jon jašče raz vybačyŭsia za chulihanstva pierad paciarpiełym padletkam i jahonaj maci, a taksama pierad UUS Homielskaha abłvykankamu. Na pieršym pasiedžańni sudu pryznaŭ, što «całkam vinavaty, a ŭčynak haniebny».
Incydent z udziełam načalnika milicyi adbyŭsia sioleta 25 krasavika. Pozna ŭviečary napadpitku Ŭładzisłaŭ Antonienka vyhulvaŭ sabaku-baksera razam z supracoŭnicaj milicyi Halinaj Kavalovaj. Sabaka kinuŭsia pad nohi maładoj pary. Miascovy žychar Uładzimier Sidaraŭ zrabiŭ zaŭvahu, što sabaka biez namyźnika. Pjanomu načalniku milicyi i jahonaj spadarožnicy zaŭvaha nie spadabałasia. Antonienka z kułakami kinuŭsia raźbiracca z tym, chto naśmieliŭsia niešta piarečyć jamu, načalniku milicyi. Pierabłytaŭ, napaŭ na padletka Vadzima Šremava, jaki taksama išoŭ pa vulicy ź dziaŭčynaj.
Momant chulihanstva načalnika Vietkaŭskaha RAUS zafiksavała kamera vonkavaha nazirańnia. Nichto na jaho nie napadaŭ, nie šturchaŭ, jak sprabavaŭ tłumačyć u sudzie sam Antonienka. Mieŭ miesca pjany načalnicki kuraž.
Uładzisłavu Antonienku niama jašče i 40. Skončyŭ Akademiju MUS. Słužbu pačynaŭ u Homielskim SIZA, paśla prasoŭvaŭsia pa karjernaj leśvicy ŭ Vietkaŭskim RAUS — ad aficera inspekcyi ŭ spravach niepaŭnaletnich da načalnika adździełu. Krasavickaje zdareńnie z udziełam Antonienki ŭ centry Vietki raśśledavali supracoŭniki USK Homielskaj vobłaści. Padpałkoŭnika milicyi zvolnili sa słužby za parušeńnie praviłaŭ prafesijnaj etyki.
