Ułady chočuć znajści 200—300 miljonaŭ jeŭra na śmiećciepalny zavod u Minsku
Adnoj z najbujniejšych inviestycyj, zakładzienaj u nacyjanalnuju stratehiju pa abychodžańni sa śmiećciem da 2035 hoda, źjaŭlajecca budaŭnictva śmiećciepalnaha zavoda ŭ Minsku. Na hetyja mety nieabchodna pryciahnuć čverć z zajaŭlenaha ahulnaha abjomu inviestycyj u 1,2 młrd jeŭra, piša Tut.by.
28 lipienia premjer-ministr Andrej Kabiakoŭ pastanovaj № 567 zaćvierdziŭ Nacyjanalnuju stratehiju pa abychodžańni ź ćviordymi kamunalnymi adchodami (CKA) i druhasnymi materyjalnymi resursami (DMR) na pieryjad da 2035 hoda. Asnoŭnyja mierapryjemstvy prahramy ŭklučajuć udaskanaleńnie zakanadaŭstva i narmatyŭnaha rehulavańnia sistemy abychodžańnia z CKA i DMR, uliku abjomaŭ utvareńnia, pachavańnia i marfałahičnaha składu adchodaŭ, raździelny zbor śmiećcia, raźvićcio kantejniernaj haspadarki i parka śmiećciavozaŭ i hetak dalej, havorycca ŭ paviedamleńni pres-słužby ŭrada.
Adnym z važnych punktaŭ novaj stratehii źjaŭlajecca budaŭnictva śmiećciepalnaha zavoda ŭ Minsku. Uźviadzieńnie kompleksu ŭ stalicy «maje jak ekanamičnyja pieradumovy (najaŭnaść syraviny, infrastruktury spažyvańnia elektryčnaj i ciepłavoj enierhii, addalenaść ad krynic spažyvańnia RDF-paliva — cemientnych zavodaŭ), tak i ekałahičnuju metazhodnaść (vysokaja kancentracyja adchodaŭ na abmiežavanaj terytoryi, abmiežavanyja mahčymaści dla pašyreńnia dziejnych palihonaŭ)», skazana ŭ stratehii.
U metach atrymańnia najbolšych ekanamičnych i ekałahičnych vynikaŭ i źnižeńnia ŭdzielnych kapitalnych vydatkaŭ pry spalvańni CKA prajektnaja mahutnaść zavoda pavinna składać 500 tysiač ton u hod, ličać raspracoŭščyki stratehii. Aryjencirovačny inviestycyjny košt budaŭnictva pradpryjemstva takoj mahutnaści ŭ vakolicach Minska składzie kala 200 młn jeŭra.
Termin budaŭnictva zavoda — 2 hady. Abjom adchodaŭ paśla spalvańnia skaračajecca da 20—30%. Pry efiektyŭnym vykarystańni šłaku i popiełu abjom možna skaracić da 10%.
Dla budaŭnictva śmiećciepalnaha zavoda patrabujecca ziamielny ŭčastak płoščaj kala 3 ha. Paśla 20 hadoŭ ekspłuatacyi nieabchodnyja inviestycyi ŭ pamiery 50% ad pieršapačatkovych — kala 100 młn jeŭra.
U krainach ES sabiekošt spalvańnia 1 tony źmiešanych adchodaŭ składaje kala 100 jeŭra. Pry prodažy elektraenierhii i ciapła minimalny sabiekošt moža skłaści 30—60 jeŭra za tonu. Uvod u ekspłuatacyju takoha zavoda skarocić abjom vyvazu adchodaŭ na palihony ŭ maštabie respubliki na 10—15%, havorycca ŭ stratehii.
U Biełarusi niama dośviedu budaŭnictva i ekspłuatacyi takich kompleksaŭ. Dla paśpiachovaj realizacyi hetaha maštabnaha prajekta prapanujecca pryciahnuć inviestara, jaki maje dastatkovy dośvied i zdolny zabiaśpiečyć prajektavańnie, budaŭnictva i dalejšuju ekspłuatacyju pradpryjemstva. Płanujecca abjavić mižnarodny inviestycyjny konkurs. Taki padychod daść mahčymaść aptymizavać ekspłuatacyjnyja i inviestycyjnyja zatraty na realizacyju prajekta, stvaryć startavyja ŭmovy i mahčymaść dla pryciahnieńnia pramych zamiežnych inviestycyj, ličać raspracoŭščyki stratehii. Asnoŭnymi krynicami pakryćcia inviestycyjnych i ekspłuatacyjnych vydatkaŭ pa funkcyjanavańni takoha zavoda źjaŭlajucca: ekanomija na śpiecyjalnaj płacie za pachavańnie; dachody ad realizacyi ciepłavoj i elektryčnaj enierhii.
Pry hetym na stadyi pryniaćcia rašeńnia ab realizacyi prajekta nieabchodna ŭličyć ŭpłyŭ na jaho ad płanavanaha raźvićcia sistemy raździelnaha zboru ćviordych kamunalnych adchodaŭ u Minsku i ŭkaranieńnie depazitnaj (zakładnoj) sistemy zvarotu adnarazovaj spažyvieckaj upakoŭki, bo paŭtornaje vykarystańnie DMR źjaŭlajecca bolš pryjarytetnym pierad spalvańniem, adznačajuć raspracoŭščyki stratehii.
