Jak na debatach Navalnaha i Strałkova zakranuli Biełaruś — cytaty
Debaty pamiž rasijskim palitykam Alaksiejem Navalnym i eks-ministram abarony «DNR» Iharam Strałkovym zahadzia byli padzielenyja na try raundy: baraćba z karupcyjaj, adnosiny z Zachadam i padziei na Danbasie. Varta zaŭvažyć, što na niekatoryja temy Strałkoŭ adkazvać admaŭlaŭsia, spasyłajučysia to na «honar aficera», to na niežadańnie razmaŭlać.
Na praciahu razmovy, naturalna, była zakranutaja tema «ŭźjadnańnia ruskaha narodu», dzie ŭzhadali i Biełaruś. Voś uryvak z dyskusii:
Navalny: Ruskija — heta najbujniejšy padzieleny narod u Jeŭropie. Ale kali vy kažacie, što balšaviki «pa-žyvomu» narysavali miežy, to vy prapanujecie mnie dziela niejkaj efiemiernaj baraćby z Zachadam pačać vajnu z Kazachstanam?
Strałkoŭ: Heta značyć, vy pryznajacie dziejsnyja miežy Rasii, prarysavanyja mienavita balšavikami?
Navalny: Ja znachodžusia ŭ 2017 hodzie. U Rasijskaj Fiederacyi jość miežy, i ja ich pryznaju.
Viadučy: Ja pastarajusia sfarmulavać ahulnaje pytańnie ad hledačoŭ [hledačy mahli dasyłać pytańni praz Tvitar — NN]. Jak mahčyma adnavić Rasiju ŭ raniejšych miežach i viarnuć manarchičny ład?
S: Adnaŭleńnie samadziaržaŭja ŭ tym vyhladzie, u jakim jano było ŭ 1917, niemahčyma, choć by tamu, što car źjaŭlaŭsia postaćciu sakralnaj. Adnavić Rasiju ŭ raniejšych miežach taksama niemahčyma, kali kazać pra Finlandyju i Polšču. Adnak nieabchodna adnavić naturalnyja miežy pražyvańnia vialikaha ruskaha naroda, jaki składajecca z troch častak: vialikarosaŭ, małarosaŭ (abo ŭkraincaŭ — usio roŭna) i biełarusaŭ.
N: Ci pavinny my zaŭtra pačać vajennuju apieracyju suprać Kazachstana, kab adabrać paŭnočny Kazachstan, dzie žyvuć ruskija ludzi?
S: Heta demahahičnaje pytańnie. (…) My pavinny da hetaha imknucca.
N: To bok zaŭtra pačynać vajennuju apieracyju suprać Biełarusi nie treba?
S: Nu heta ja vas pytaju, vy ž źbirajeciesia stać prezidentam. Paznačcie svaju pazicyju.
N: Ja vystupaju za toje, kab hramadzianam Rasii dać mahčymaść narmalna pažyć, kab jany bahacieli i narmalna raźvivalisia, kab u Rasii nie było hetaha žachu i kašmaru, kali prychodziš u balnicu ŭ Maskoŭskaj vobłaści, i tam pravalvajucca stoli. Ja liču, što dziela hetych chimieraŭ typu «davajcie my adnovim» i hetak dalej my nie možam achviaravać dabrabytam narodu.
S: Vy ŭpeŭnienyja, što heta mahčyma budzie zrabić, nie adnaviŭšy ekanamičnuju cełasnaść byłoj krainy?
N: Ja ŭpeŭnieny, što heta mahčyma zrabić naŭprost ciapier. I ŭžo praz try hady Rasija budzie žyć značna lepš. Hramadzianie Rasii buduć atrymlivać udvaja bolšyja zarpłaty dziakujučy narmalnym reformam.
