U 80-hadovaha sienatara Makiejna vyjavili ahresiŭnuju puchlinu mozhu
U 80-hadovaha amierykanskaha sienatara Džona Makiejna dyjahnastavali puchlinu mozhu, ciapier jon vyvučaje varyjanty lačeńnia, paviedamili pradstaŭniki vieterana-respublikanca.
Lačeńnie moža ŭklučać u siabie kambinacyju chimijaterapii i radyjacyjnaha apramianieńnia. Paviedamlajecca, što Makiejn znachodzicca doma ŭ badziorym nastroi.
Puchlinu ŭ jaho znajšli padčas apieracyi na levym voku na minułym tydni, padčas jakoj jamu vydalili tromb z kryvianosnych sasudaŭ voka.
Analiz tkanin pakazaŭ, što ŭ Makiejna hlijabłastoma — pieršasnaja puchlina mozhu.
Pa słovach daktaroŭ Makiejna, jon «vielmi dobra» adnaŭlajecca paśla apieracyi, i ŭ cełym stan jaho zdaroŭja vydatny.
Hlijabłastoma — najbolš raspaŭsiudžanaja i ahresiŭnaja forma puchliny mozhu, jakaja čaściej prajaŭlajecca ŭ mužčyn, čym žančyn. Ryzyka jaje ŭźniknieńnia pavialičvajecca z uzrostam.
Makiejn — daŭni žorstki krytyk Rasii, a taksama i asabista Uładzimira Pucina. Jon nieadnarazova vystupaŭ za padaŭžeńnie i ŭzmacnieńnie antyrasijskich sankcyj.
Jon taksama vystupaŭ suprać represij u Biełarusi, pavahi pravoŭ čałavieka, u červieni 2015 hoda zajaviŭ, što Biełaruś zasłuhoŭvaje šaniec na ŭvachodžańnie ŭ ES i NATA, ale dziela heta treba demakratyzacyja.
***
Sienatar ad Aryzony z 1987 hoda, na vybarach prezidenta ZŠA ŭ 2008 hodzie jon byŭ kandydatam ad Respublikanskaj partyi i prajhraŭ Baraku Abamie.
Makkiejn pravioŭ piać z pałovaj hadoŭ u vjetnamskim pałonie, dzie padviarhaŭsia katavańniam. Byŭ vyzvaleny ŭ 1973 hodzie, paśla padpisańnia Paryžskich mirnych pahadnieńniaŭ.
Dla siamji Makkiejna viestka ab jaho zachvorvańni stałasia šokam, paviedamiła 32-hadovaja dačka sienatara Miehan.
«Z nas usich u hetaj situacyi samy spakojny i ŭpeŭnieny - moj baćka», — napisała jana ŭ «Tvitary».
«Chvaroba moža paŭpłyvać na jaho, ale jon nie zdasca. Jon nikoli nie zdajecca», — dadała jana.
Prezident Donald Tramp skazaŭ, što Makkiejn «zaŭsiody byŭ zmaharom», i pažadaŭ jamu najchutčejšaha vyzdaraŭleńnia.
Były prezident Barak Abama ŭ svajoj tvicie napisaŭ: «Džon Makkiejn — hieroj Amieryki i adzin z samych advažnych zmaharoŭ, jakich ja kali-niebudź viedaŭ. Rak nie viedaje, z kim jon źviazaŭsia. Zadaj jamu, Džon».