Ministr zamiežnych spraŭ Łatvii: U nas bolš niama pytańniaŭ da Biełarusi pa vučeńniach «Zachad-2017»
Biełaruś i Łatvija abmieńvajucca infarmacyjaj, u tym liku na ŭzroŭni ministerstvaŭ abarony, kab źnizić mahčymaść «usialakich ryzyk i zdareńniaŭ» padčas budučych biełaruska-rasijskich vučeńniaŭ «Zachad-2017». Pra heta zajaviŭ žurnalistam kiraŭnik MZS Łatvii Edhars Rynkievičs paśla pieramovaŭ ź biełaruskim kaleham Uładzimiram Makiejem u Minsku.
Fota Darji Burakinaj
Rynkievičs nahadaŭ, što Łatvija ŭvachodzić u NATO, a Biełaruś — u ADKB.
— My z pavahaj stavimsia da vybaru, jaki robiać našy susiedzi ŭ śfiery biaśpieki. Vy viedajecie, što ŭ krainach Bałtyi dysłakavanyja dadatkovyja kantynhienty NATA. Hetaha b nie zdaryłasia, kali b nie było padziej 2014 hoda ŭ Krymie.
Ale Biełaruś i Łatvija abmieńvajucca infarmacyjaj, kab źnizić mahčymaść «usialakich ryzyk i zdareńniaŭ», a pamiž Minabarony abiedźviuch krain zaklučany pahadnieńni ab supracoŭnictvie.
- U nas niama bolš pytańniaŭ da Biełarusi z nahody «Zachadu-2017». Ministr [Makiej] mnie vielmi padrabiazna rastłumačyŭ dziaržaŭnuju pazicyju.
Rynkievičs dadaŭ, što biełaruska-jeŭrapiejskija adnosiny pačali mieć bolš racyjanalny i kanstruktyŭny charaktar, i mnohaje, čaho čakali abodva ministry paśla ich papiaredniaj sustrečy ŭ Minsku 2,5 hady tamu, ažyćciaviłasia.
— Heta pakazvaje, što my nie tolki razmaŭlajem, ale i dasiahajem kankretnaha vyniku.
Baki abmierkavali spraščeńnie vizavaha režymu pamiž Biełaruśsiu i ES, łatvijski ministr padniaŭ i pytańni pravoŭ čałavieka.
— My vielmi chacieli b bačyć, kab Biełaruś uviała maratoryj na śmiarotnaje pakarańnie i prachodziła rehistracyja palityčnych partyj. My kazali i pra svabodu presy. My razumiejem, što jość pytańni, jakija nie mohuć vyrašacca tak chutka. Ale toje, jak my vyrašajem hetyja pytańni, daje mnie padstavu skazać, što jość prahres i jon budzie praciahvacca.
Makiej taksama prainfarmavaŭ Rynkievičsa ab mierach pa biaśpiecy budaŭnictva BiełAES, i hetaja infarmacyja łatvijskaha ministra «abnadzieiła».
— Tak što ja baču pierśpiektyvu [u adnosinach], ale nie čakajcie praryvu, - reziumavaŭ kiraŭnik MZS Łatvii.
Uładzimir Makiej u svaju čarhu vykazaŭ padziaku kalehu za sadziejničańnie Łatvii ŭ źniaćci jeŭrapiejskich sankcyj u minułym hodzie. Pavodle słoŭ biełaruskaha ministra, u dźviuch krain adsutničajuć roznahałośsi pa «pieravažnaj bolšaści pytańniaŭ».
- Napiaredadni praviadzieńnia ŭ Biełarusi i Łatvii čempijanatu śvietu pa chakiei ŭ 2021 hodzie, nieabchodna ŭžo ciapier pačynać pracu pa stvareńni sumiesnych łahistyčnych praduktaŭ i maršrutaŭ, udaskanaleńni aŭtamabilnaj infrastruktury i prydarožnaha servisu.
Pierad padychodam da presy ministry ŭračysta pahasili paštovyja marki, pryśviečanyja 25-hodździu dypłamatyčnych adnosin dźviuch krain.