Kiraŭnik «DNR» zajaviŭ pra stvareńnie dziaržavy «Małarosii», jakaja budzie prasicca ŭ sajuz z Rasijaj i Biełaruśsiu
Reuters.com
Kiraŭnik samaabvieščanaj Danieckaj narodnaj respubliki Alaksandr Zacharčanka abviaściŭ pra zasnavańnie novaj dziaržavy — Małarosii.
Dziaržava zasnavana ŭ miežach Ukrainy (za vyklučeńniem Kryma). Stalicaj Małarosii abvieščany Danieck, a Kijeŭ zastajecca «historyka-kulturnym centram biez statusu staličnaha horada».
Pa słovach Zacharčanki, «pierazasnavańnie krainy» dazvolić skončyć vajnu va Ukrainie. Pry hetym, na jaho dumku, «sama nazva Ukraina dyskredytavała siabie».
Zacharčanka taksama prapanavaŭ ŭvieści ŭ novaj dziaržavie nadzvyčajnaje stanovišča na try hady. Na hety čas budzie zabaroniena dziejnaść palityčnych partyj, u hety ž termin pavinny być rasśledavanyja «złačynstvy ŭ Adesie, na Majdanie, na Danbasie».
Jak zajaviŭ žurnalistam Alaksandr Zacharčanka, zasnavańnie Małarosii inicyjavali «pradstaŭniki rehijonaŭ byłoj Ukrainy». Jakich mienavita rehijonaŭ, jon nie ŭdakładniŭ. Kiraŭnik DNR zaŭvažyŭ taksama, što dla realizacyi prajekta spatrebicca padtrymka žycharoŭ Ukrainy i mižnarodnaj supolnaści.
U kanstytucyi «Małarosii» budzie zamacavany pazabłokavy status i kurs na adnaŭleńnie suviaziaŭ z Rasijaj, zajaviŭ vice-premjer samaabvieščanaj Danieckaj narodnaj respubliki, ministr dachodaŭ i zboraŭ Alaksandr Cimafiejeŭ.
«Kurs na dałučeńnie da Sajuznaj dziaržavy Rasii i Biełarusi pry zachavańni niezaležnaści i suvierenitetu. Zachavańnie biaźvizu ŭ vypadku zhody Jeŭrasajuza. Dealiharchizacyja, u tym liku na zakanadaŭčym uzroŭni», - dadaŭ Cimafiejeŭ.
