Padatkovaja spytaje, adkul hrošy, kali vydatki pieravysili dachody na 3000 dalaraŭ
Ad 15 lipienia nabyła siłu pastanova Savietu ministraŭ, zhodna ź jakoj padatkovy orhan moža zapatrabavać deklaracyju, kali maje infarmacyju ad KDB, MUS, Kamitetu dziaržkantrolu, prakuratury ci śledčych ab pieravyšeńni koštu ŭłasnaści fizyčnaj asoby, i raschodaŭ nad dachodami, atrymanymi z zakonnych krynicaŭ.
Suma «pieravyšeńnia» — nia mienš jak 250 bazavych vieličyń (5750 rubloŭ — kala 3000 dalaraŭ na momant publikacyi). Takoje «pieravyšeńnie» roŭnaje 7,2 siaredniaha zarobku biełarusa pavodle Nacyjanalnaha statystyčnaha kamitetu.
Patrabavańnie ab deklaracyi (za minuły kalandarny hod abo minułyja miesiacy biahučaha hodu) buduć davać pad podpis «padazravanamu». Kali toj ciaham 30 dzion z atrymańnia patrabavańnia nie pradstavić deklaracyju, na sumu pieravyšeńnia (padličanaha pavodle ŭłasnych źviestak padatkavikoŭ) naličać padachodny padatak (pa zmaŭčańni 13%).
Pradstaŭleńnie deklaracyi moža być pieraniesienaje na nia bolš jak try miesiacy pavodle rašeńnia načalnikaŭ inspekcyjaŭ, ministra pa padatkach i zborach abo jaho namieśnikaŭ. Pryčynami mohuć być, naprykład, časovaja niepracazdolnaść abo znachodžańnie za miežami Biełarusi.
U deklaracyi nia treba paznačać asabistyja rečy canoj da 2000 bazavych vieličyniaŭ (46 tysiač rubloŭ abo 23,4 tysiačy dalaraŭ). Ale pavodle novaj redakcyi zakonu deklaravać treba navat majomaść, što jašče budujecca, mašynamiescy ŭ parkinhach žyłych damoŭ i doli ŭ statutnych fondach na sumu bolš za 2000 bazavych vieličyniaŭ.
