Łukašenka: Paśla nas — mianie, Pucina — pryjduć inšyja ludzi
Alaksandr Łukašenka ŭ intervju ahienctvu TASS raskazaŭ pra svaje pohlady na budučaje raźvićcio Sajuznaj dziaržavy. Kiraŭnik Biełarusi adznačyŭ, što «zanadta aptymistyčnym siońnia być padstaŭ niama», ale «praces pajšoŭ i spynić jaho budzie praktyčna niemahčyma». Uryŭki ź intervju byli pakazany ŭ viačernim efiry telekanała «Biełaruś-1».
Łukašenka raskazaŭ, pra što razmaŭlaŭ z Pucinym
Pasiadžeńnie Vyšejšaha dziaržaŭnaha savieta Sajuznaj dziaržavy, što prajšło 30 červienia, było dušeŭnym i vynikovym.
«Mahu vas ździvić: hałoŭnaje — navat nie ŭ važnaści razhladajemych pytańniaŭ, jany byli supiervažnyja. Važny byŭ duch hetaha Vyšejšaha dziaržaŭnaha savieta. Ja adkryta pra heta skazaŭ: nikoli ŭ historyi farmiravańnia Sajuznaj dziaržavy, a my jaje jašče farmirujem) nie było takoj adkrytaści i dušeŭnaści, i samaje hałoŭnaje, vynikovaści», — zajaviŭ Alaksandr Łukašenka.
Jon raspavioŭ, što mierapryjemstva pačałosia ź pieramoŭ u vuzkim składzie. Baki vyrašyli źniać pytańni, jakija lažali na pavierchni i nie abaviazkova pavinny byli abmiarkoŭvacca ŭ šyrokim kole. «Jany ničoha nie vartyja, ich treba było daŭno vyrašyć. I my hetyja ŭsie pytańni vyrašyli, jany taksama važnyja. Dzieści stratehičnyja pytańni zakranuli z ulikam taho, što na ich treba było źviarnuć uvahu nie tolki na pieramovach dvuch prezidentaŭ, ale i z uklučeńniem u paradak dnia Vyšejšaha dziaržsavieta na budučyniu», — dadaŭ Łukašenka.
Jon taksama raspavioŭ, što na adkrytaj častcy pasiadžeńnia razhladalisia dva najvažniejšyja fundamientalnyja pytańni: pramysłovaść i sielskaja haspadarka.
«Potym my zaćviardžali płany ŭ zamiežnaj palitycy. U nas idealna Łaŭroŭ i Makiej pracujuć, prykład dla ŭsich. Abmiarkoŭvali niekatoryja abaronnyja pytańni, našy vučeńni «Zachad-2017». Nas paprakajuć pa hetych vučeńniaŭ, a tam ža razhortvajucca padraździaleńnia NATA — kala našych miežaŭ, biełaruskich i rasijskich», — paviedamiŭ Łukašenka.
Pavodle jaho słoŭ, byli zakranuty i pytańni vajenna-pramysłovaha kompleksu: «Nam treba kaapieravacca, nie spyniać tyja suviazi, jakija byli ŭ savieckaj dziaržavie».
Sajuznaja dziaržava: praces pajšoŭ
Adkazvajučy na pytańnie pra svaje pohlady na budučyniu raźvićcia Sajuznaj dziaržavy — aptymist abo piesimist ŭ hetym pytańni prezident Biełarusi, — Alaksandr Łukašenka padkreśliŭ, što praces pajšoŭ i spynić jaho budzie praktyčna niemahčyma.
«Zanadta aptymistyčnym, kali ščyra, siońnia być padstaŭ niama. Zanadta aptymistyčnym. Ale ž praces pajšoŭ. I spynić jaho budzie praktyčna niemahčyma. Nikomu. Paśla nas — mianie, Pucina — pryjduć ža inšyja ludzi. I ja dumaju, što nie daj boh nam paśla siabie pakinuć tendencyju da paharšeńnia. Kali my pakiniem tendencyju da palapšeńnia, pryjduć na hetaj chvali novyja ludzi, jakija, moža być, zmohuć zrabić šerah krokaŭ, jakija nas abjadnajuć i źjadnajuć», — zajaviŭ Łukašenka.
