U mietro skaračajuć žančyn-kantralorak. Ci jość tut seksizm?
Dniami stała viadoma, što ŭ chutkim časie na ŭsich ŭvachodach stancyj minskaha mietro žančyn-kantraloraŭ zamieniać «inśpiektary słužby biaśpieki»: ekśpierymient pa aptymizacyi kadraŭ užo adbyŭsia na bolšaści stancyj druhoj linii mietro. Poŭny pierachod na novuju sistemu pracy adbudziecca da siaredziny 2018 hoda.
Mnohija ŭspryniali navinu jak čarhovuju niespraviadlivuju sprobu padzialić prafiesii na «mužčynskija» i «žanočyja». Asabliva aburalisia fieministki. Ich ahulny pohlad na situacyju my paprasili ahučyć Irynu Alchoŭku, kiraŭnicu arhanizacyi «Hiendarnyja pierśpiektyvy»:
«U najaŭnaści — nahladny prykład dzialeńnia prafiesij na žanočyja i mužčynskija. Tradycyjna skłałasia, što mienavita žančyny pracujuć na pasadach kantraloraŭ, a voś za biaśpieku čaściej adkazvajuć mužčyny. I za heta, darečy, kudy lepš płaciać. Žančyny nie ciahnuć novyja ŭmovy — i pieršymi iduć na skaračeńnie. Mnie b chaciełasia vieryć, što ich nie prosta zvolniać, a pieraviaduć na inšuju pracu, i ich los składziecca dobra».
Losam supracoŭnic, ź jakimi raźvitvajucca ŭ ramkach dadzienaj aptymizacyi, my pacikavilisia ŭ pres-słužbie mietrapalitena.
«Zvolnienym kantraloram budzie prapanavanaja praca ŭ inšych strukturach mietrapalitena, nichto nie źbirajecca vykidać ludziej na vulicu. A što tyčycca infarmacyi, što my nibyta vyhaniajem tolki žančyn i zamianiajem ich mužčynami, mienavita ŚMI padali z seksisckim adcieńniem. U nas i ŭ słužbie biaśpieki pracujuć žančyny, kali niechta nie zaŭvažyŭ. U struktury niama dzialeńnia na mužčyn i žančyn. Hałoŭnaje, kab byŭ dobry rabotnik, poł — heta ŭžo druhasnaje», — prakamientavaŭ «NN» pres-sakratar Andrej Kuźmin.
