У метро скарачаюць жанчын-кантралёрак. Ці ёсць тут сэксізм?
Днямі стала вядома, што ў хуткім часе на ўсіх ўваходах станцый мінскага метро жанчын-кантралёраў заменяць «інспектары службы бяспекі»: эксперымент па аптымізацыі кадраў ужо адбыўся на большасці станцый другой лініі метро. Поўны пераход на новую сістэму працы адбудзецца да сярэдзіны 2018 года.
Многія ўспрынялі навіну як чарговую несправядлівую спробу падзяліць прафесіі на «мужчынскія» і «жаночыя». Асабліва абураліся феміністкі. Іх агульны погляд на сітуацыю мы папрасілі агучыць Ірыну Альхоўку, кіраўніцу арганізацыі «Гендарныя перспектывы»:
«У наяўнасці — наглядны прыклад дзялення прафесій на жаночыя і мужчынскія. Традыцыйна склалася, што менавіта жанчыны працуюць на пасадах кантралёраў, а вось за бяспеку часцей адказваюць мужчыны. І за гэта, дарэчы, куды лепш плацяць. Жанчыны не цягнуць новыя ўмовы — і першымі ідуць на скарачэнне. Мне б хацелася верыць, што іх не проста звольняць, а перавядуць на іншую працу, і іх лёс складзецца добра».
Лёсам супрацоўніц, з якімі развітваюцца ў рамках дадзенай аптымізацыі, мы пацікавіліся ў прэс-службе метрапалітэна.
«Звольненым кантралёрам будзе прапанаваная праца ў іншых структурах метрапалітэна, ніхто не збіраецца выкідаць людзей на вуліцу. А што тычыцца інфармацыі, што мы нібыта выганяем толькі жанчын і замяняем іх мужчынамі, менавіта СМІ падалі з сэксісцкім адценнем. У нас і ў службе бяспекі працуюць жанчыны, калі нехта не заўважыў. У структуры няма дзялення на мужчын і жанчын. Галоўнае, каб быў добры работнік, пол — гэта ўжо другаснае», — пракаментаваў «НН» прэс-сакратар Андрэй Кузьмін.
