Navošta chočuć znosić Asmałoŭku? Siem hałoŭnych pytańniaŭ i adkazaŭ
Padčas sustrečy pradstaŭnikoŭ ułady z žycharami Asmałoŭki prahučała šmat pytańniaŭ, ale mała adkazaŭ. Niekatoryja adkazy hałoŭny architektar prajekta detalnaha płanu terytoryi kvartału Alaksandr Bandarčyk i kiraŭnik Centralnaha rajona Minska Ihar Buzoŭski dali ŭžo paśla zaviaršeńnia aficyjnaj častki schodu padčas razmovy z žurnalistami.
Padčas prezientacyi prajekta zabudovy Asmałoŭki. Fota Siarhieja Hudzilina.
Asmałoŭka — rajon paślavajennaj zabudovy ŭ centry Minska. Heta adzinaje miesca, dzie padobny kompleks budynkaŭ zastaŭsia cełym kvartałam. U svoj čas jaho rabili najlepšyja architektary z Kijeva, Charkava, Maskvy i naš ziamlak Michaił Asmałoŭski, jaki ŭ 1945—1951 hadach uznačalvaŭ Upraŭleńnie spraŭ architektury pry Saviecie Ministraŭ BSSR.
Ci jość inviestar?
Ciapier inviestara niama i nieviadoma, kali jon źjavicca i ci źjavicca ŭvohule. Znasić abjekty treba na 27% terytoryi kvartału. Z punktu hledžańnia biznesu, pracent znosu, bolšy za 15%, — nierentabielny.
Chto moža harantavać, što paśla znosu Asmałoŭki nie budzie pustyru?
Terytoryju pa-roznamu aceńvali i vyrašyli, što najlepšaje rašeńnie — znos. Kab zachavać histaryčnuju zabudovu, jaje treba faktyčna pabudavać nanoŭ z sučasnych materyjałaŭ. Heta nierentabielna.
«Ale, u pryncypie, rekanstrukcyja moža być. Ciapier my ŭvieś čas sutykajemsia ź situacyjaj, kali inviestar prychodzić na placoŭku, dzie miarkujecca znos, i kaža: «Ja nie budu znosić, davajcie ja častkova albo całkam rekanstrujuju budynak, jaki jość». Tamu ciapier my ŭ prajektach pišam, što budynak padlahaje znosu, stavim kropku i paznačajem: nieabchodnaść znosu zaležyć ad zamoŭcy na dalejšych stadyjach prajektavańnia, — patłumačyŭ Bandarčyk. — Mierkavańnie žycharoŭ, što za vuhłom stajać pačvary z zaviedzienym buldozieram i varta tolki adviarnucca, jak usio paholać, — dalokaje ad praŭdy».
Što, kali Asmałoŭku pryznajuć historyka-kulturnaj kaštoŭnaściu?
Detalny płan budzie skarektavany. Štości mohuć dabudavać ci pierabudavać unutry kvartału. Naprykład, na terytoryi dziciačych sadkoŭ.
Darečy, heta ŭžo treci detalny płan. Dva papiarednija byli adchilenyja.
Navošta ŭsio heta?
Na vypadak, kali pryjdzie inviestar.
Detalny płan musić stvaryć peŭnyja miežy dla pierabudovy. Naprykład, chtości pryjdzie i skaža, što choča ŭźvieści na miescy Asmałoŭki try chmaračosy. Prapanovu adchilać, kali detalny płan padobnych budynkaŭ nie praduhledžvaje.
Čamu mienavita Asmałoŭka?
Da inšych budynkaŭ va ŭładaŭ nie dajšli ruki. Albo dajšli, ale pakul što nie dajšło da hramadskich abmierkavańniaŭ.
Ci buduć rabić kapitalny ramont?
Pakul nie zaćvierdžany płan detalnaj płaniroŭki, kapitalnaha ramontu žychary mohuć nie čakać. Kali budzie kančatkova pryniataje rašeńnie pra znos ci rekanstrukcyju, tady i budzie vyrašacca hetaje pytańnie.
Treba adznačyć, što apošni kapitalny ramont u hetych damach pravodzili ŭ 1980-ch.
Chto i kali prymie kančatkovaje rašeńnie pa Asmałoŭcy?
Bližejšyja niekalki tydniaŭ praciahnucca hramadskija abmierkavańni.
Kali detalny płan pa vynikach buduć rekamiendavać da dalejšaha zaćviardžeńnia, jaho nakirujuć na ekałahičnuju ekśpiertyzu i hałoŭdziaržbudekśpiertyzu.
Kali ekśpiertyzy buduć projdzienyja paśpiachova, detalny płan addaduć na zaćviardžeńnie ŭ Minharvykankam, jaki i prymie kančatkovaje rašeńnie.
Samaje chutkaje, kali jano moža być pryniata, — praz try miesiacy.
Piać pryčyn, čamu Asmałoŭka nie pavinna być źniesienaja
